Lev 15:1 א וידבר יהוה אל משה ואל אהרן לאמר
Lev 15:2 ב דברו אל בני ישראל ואמרתם אלהם  איש איש כי יהיה זב מבשרו--זובו טמא הוא
Lev 15:3 ג וזאת תהיה טמאתו בזובו  רר בשרו את זובו או החתים בשרו מזובו--טמאתו הוא
Lev 15:4 ד כל המשכב אשר ישכב עליו הזב--יטמא וכל הכלי אשר ישב עליו יטמא
Lev 15:5 ה ואיש אשר יגע במשכבו--יכבס בגדיו ורחץ במים וטמא עד הערב
Lev 15:6 ו והישב על הכלי אשר ישב עליו הזב--יכבס בגדיו ורחץ במים וטמא עד הערב
Lev 15:7 ז והנגע בבשר הזב--יכבס בגדיו ורחץ במים וטמא עד הערב
Lev 15:8 ח וכי ירק הזב בטהור--וכבס בגדיו ורחץ במים וטמא עד הערב
Lev 15:9 ט וכל המרכב אשר ירכב עליו הזב--יטמא
Lev 15:10 י וכל הנגע בכל אשר יהיה תחתיו--יטמא עד הערב והנושא אותם--יכבס בגדיו ורחץ במים וטמא עד הערב
Lev 15:11 יא וכל אשר יגע בו הזב וידיו לא שטף במים--וכבס בגדיו ורחץ במים וטמא עד הערב
Lev 15:12 יב וכלי חרש אשר יגע בו הזב ישבר וכל כלי עץ--ישטף במים
Lev 15:13 יג וכי יטהר הזב מזובו--וספר לו שבעת ימים לטהרתו וכבס בגדיו ורחץ בשרו במים חיים וטהר
Lev 15:14 יד וביום השמיני יקח לו שתי תרים או שני בני יונה ובא לפני יהוה אל פתח אהל מועד ונתנם אל הכהן
Lev 15:15 טו ועשה אתם הכהן--אחד חטאת והאחד עלה וכפר עליו הכהן לפני יהוה מזובו  {ס}
Lev 15:16 טז ואיש כי תצא ממנו שכבת זרע--ורחץ במים את כל בשרו וטמא עד הערב
Lev 15:17 יז וכל בגד וכל עור אשר יהיה עליו שכבת זרע--וכבס במים וטמא עד הערב
Lev 15:18 יח ואשה אשר ישכב איש אתה שכבת זרע--ורחצו במים וטמאו עד הערב  {פ}
Lev 15:19 יט ואשה כי תהיה זבה דם יהיה זבה בבשרה--שבעת ימים תהיה בנדתה וכל הנגע בה יטמא עד הערב
Lev 15:20 כ וכל אשר תשכב עליו בנדתה יטמא וכל אשר תשב עליו יטמא
Lev 15:21 כא וכל הנגע במשכבה--יכבס בגדיו ורחץ במים וטמא עד הערב
Lev 15:22 כב וכל הנגע--בכל כלי אשר תשב עליו  יכבס בגדיו ורחץ במים וטמא עד הערב
Lev 15:23 כג ואם על המשכב הוא או על הכלי אשר הוא ישבת עליו--בנגעו בו  יטמא עד הערב
Lev 15:24 כד ואם שכב ישכב איש אתה ותהי נדתה עליו--וטמא שבעת ימים וכל המשכב אשר ישכב עליו יטמא  {ס}
Lev 15:25 כה ואשה כי יזוב זוב דמה ימים רבים בלא עת נדתה או כי תזוב על נדתה  כל ימי זוב טמאתה כימי נדתה תהיה--טמאה הוא
Lev 15:26 כו כל המשכב אשר תשכב עליו כל ימי זובה--כמשכב נדתה יהיה לה וכל הכלי אשר תשב עליו--טמא יהיה כטמאת נדתה
Lev 15:27 כז וכל הנוגע בם יטמא וכבס בגדיו ורחץ במים וטמא עד הערב
Lev 15:28 כח ואם טהרה מזובה--וספרה לה שבעת ימים ואחר תטהר
Lev 15:29 כט וביום השמיני תקח לה שתי תרים או שני בני יונה והביאה אותם אל הכהן אל פתח אהל מועד
Lev 15:30 ל ועשה הכהן את האחד חטאת ואת האחד עלה וכפר עליה הכהן לפני יהוה מזוב טמאתה
Lev 15:31 לא והזרתם את בני ישראל מטמאתם ולא ימתו בטמאתם בטמאם את משכני אשר בתוכם
Lev 15:32 לב זאת תורת הזב ואשר תצא ממנו שכבת זרע לטמאה בה
Lev 15:33 לג והדוה בנדתה והזב את זובו לזכר ולנקבה ולאיש אשר ישכב עם טמאה  {פ}