Lev 11:1 א וידבר יהוה אל משה ואל אהרן לאמר אלהם
Lev 11:2 ב דברו אל בני ישראל לאמר  זאת החיה אשר תאכלו מכל הבהמה אשר על הארץ
Lev 11:3 ג כל מפרסת פרסה ושסעת שסע פרסת מעלת גרה בבהמה--אתה תאכלו
Lev 11:4 ד אך את זה לא תאכלו ממעלי הגרה וממפרסי הפרסה  את הגמל כי מעלה גרה הוא ופרסה איננו מפריס--טמא הוא לכם
Lev 11:5 ה ואת השפן כי מעלה גרה הוא ופרסה לא יפריס טמא הוא לכם
Lev 11:6 ו ואת הארנבת כי מעלת גרה הוא ופרסה לא הפריסה טמאה הוא לכם
Lev 11:7 ז ואת החזיר כי מפריס פרסה הוא ושסע שסע פרסה והוא גרה לא יגר טמא הוא לכם
Lev 11:8 ח מבשרם לא תאכלו ובנבלתם לא תגעו טמאים הם לכם
Lev 11:9 ט את זה תאכלו מכל אשר במים  כל אשר לו סנפיר וקשקשת במים בימים ובנחלים--אתם תאכלו
Lev 11:10 י וכל אשר אין לו סנפיר וקשקשת בימים ובנחלים מכל שרץ המים ומכל נפש החיה אשר במים--שקץ הם לכם
Lev 11:11 יא ושקץ יהיו לכם מבשרם לא תאכלו ואת נבלתם תשקצו
Lev 11:12 יב כל אשר אין לו סנפיר וקשקשת במים--שקץ הוא לכם
Lev 11:13 יג ואת אלה תשקצו מן העוף לא יאכלו שקץ הם  את הנשר ואת הפרס ואת העזניה
Lev 11:14 יד ואת הדאה--ואת האיה למינה
Lev 11:15 טו את כל ערב למינו
Lev 11:16 טז ואת בת היענה ואת התחמס ואת השחף ואת הנץ למינהו
Lev 11:17 יז ואת הכוס ואת השלך ואת הינשוף
Lev 11:18 יח ואת התנשמת ואת הקאת ואת הרחם
Lev 11:19 יט ואת החסידה האנפה למינה ואת הדוכיפת ואת העטלף
Lev 11:20 כ כל שרץ העוף ההלך על ארבע--שקץ הוא לכם
Lev 11:21 כא אך את זה תאכלו מכל שרץ העוף ההלך על ארבע  אשר לא (לו) כרעים ממעל לרגליו לנתר בהן על הארץ
Lev 11:22 כב את אלה מהם תאכלו--את הארבה למינו ואת הסלעם למינהו ואת החרגל למינהו ואת החגב למינהו
Lev 11:23 כג וכל שרץ העוף אשר לו ארבע רגלים--שקץ הוא לכם
Lev 11:24 כד ולאלה תטמאו כל הנגע בנבלתם יטמא עד הערב
Lev 11:25 כה וכל הנשא מנבלתם--יכבס בגדיו וטמא עד הערב
Lev 11:26 כו לכל הבהמה אשר הוא מפרסת פרסה ושסע איננה שסעת וגרה איננה מעלה--טמאים הם לכם כל הנגע בהם יטמא
Lev 11:27 כז וכל הולך על כפיו בכל החיה ההלכת על ארבע--טמאים הם לכם כל הנגע בנבלתם יטמא עד הערב
Lev 11:28 כח והנשא את נבלתם--יכבס בגדיו וטמא עד הערב טמאים המה לכם  {ס}
Lev 11:29 כט וזה לכם הטמא בשרץ השרץ על הארץ  החלד והעכבר והצב למינהו
Lev 11:30 ל והאנקה והכח והלטאה והחמט והתנשמת
Lev 11:31 לא אלה הטמאים לכם בכל השרץ כל הנגע בהם במתם יטמא עד הערב
Lev 11:32 לב וכל אשר יפל עליו מהם במתם יטמא מכל כלי עץ או בגד או עור או שק כל כלי אשר יעשה מלאכה בהם במים יובא וטמא עד הערב וטהר
Lev 11:33 לג וכל כלי חרש--אשר יפל מהם אל תוכו  כל אשר בתוכו יטמא ואתו תשברו
Lev 11:34 לד מכל האכל אשר יאכל אשר יבוא עליו מים--יטמא וכל משקה אשר ישתה בכל כלי יטמא
Lev 11:35 לה וכל אשר יפל מנבלתם עליו יטמא--תנור וכירים יתץ טמאים הם וטמאים יהיו לכם
Lev 11:36 לו אך מעין ובור מקוה מים יהיה טהור ונגע בנבלתם יטמא
Lev 11:37 לז וכי יפל מנבלתם על כל זרע זרוע אשר יזרע--טהור הוא
Lev 11:38 לח וכי יתן מים על זרע ונפל מנבלתם עליו--טמא הוא לכם  {ס}
Lev 11:39 לט וכי ימות מן הבהמה אשר היא לכם לאכלה--הנגע בנבלתה יטמא עד הערב
Lev 11:40 מ והאכל מנבלתה--יכבס בגדיו וטמא עד הערב והנשא את נבלתה--יכבס בגדיו וטמא עד הערב
Lev 11:41 מא וכל השרץ השרץ על הארץ--שקץ הוא לא יאכל
Lev 11:42 מב כל הולך על גחון וכל הולך על ארבע עד כל מרבה רגלים לכל השרץ השרץ על הארץ--לא תאכלום כי שקץ הם
Lev 11:43 מג אל תשקצו את נפשתיכם בכל השרץ השרץ ולא תטמאו בהם ונטמתם בם
Lev 11:44 מד כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ
Lev 11:45 מה כי אני יהוה המעלה אתכם מארץ מצרים להית לכם לאלהים והייתם קדשים כי קדוש אני
Lev 11:46 מו זאת תורת הבהמה והעוף וכל נפש החיה הרמשת במים ולכל נפש השרצת על הארץ
Lev 11:47 מז להבדיל בין הטמא ובין הטהר ובין החיה הנאכלת ובין החיה אשר לא תאכל  {פ}