Lev 9:1 א ויהי ביום השמיני קרא משה לאהרן ולבניו--ולזקני ישראל
Lev 9:2 ב ויאמר אל אהרן קח לך עגל בן בקר לחטאת ואיל לעלה--תמימם והקרב לפני יהוה
Lev 9:3 ג ואל בני ישראל תדבר לאמר  קחו שעיר עזים לחטאת ועגל וכבש בני שנה תמימם לעלה
Lev 9:4 ד ושור ואיל לשלמים לזבח לפני יהוה ומנחה בלולה בשמן  כי היום יהוה נראה אליכם
Lev 9:5 ה ויקחו את אשר צוה משה אל פני אהל מועד ויקרבו כל העדה ויעמדו לפני יהוה
Lev 9:6 ו ויאמר משה זה הדבר אשר צוה יהוה תעשו--וירא אליכם כבוד יהוה
Lev 9:7 ז ויאמר משה אל אהרן קרב אל המזבח ועשה את חטאתך ואת עלתך וכפר בעדך ובעד העם ועשה את קרבן העם וכפר בעדם כאשר צוה יהוה
Lev 9:8 ח ויקרב אהרן אל המזבח וישחט את עגל החטאת אשר לו
Lev 9:9 ט ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח
Lev 9:10 י ואת החלב ואת הכלית ואת היתרת מן הכבד מן החטאת--הקטיר המזבחה  כאשר צוה יהוה את משה
Lev 9:11 יא ואת הבשר ואת העור שרף באש מחוץ למחנה
Lev 9:12 יב וישחט את העלה וימצאו בני אהרן אליו את הדם ויזרקהו על המזבח סביב
Lev 9:13 יג ואת העלה המציאו אליו לנתחיה--ואת הראש ויקטר על המזבח
Lev 9:14 יד וירחץ את הקרב ואת הכרעים ויקטר על העלה המזבחה
Lev 9:15 טו ויקרב את קרבן העם ויקח את שעיר החטאת אשר לעם וישחטהו ויחטאהו כראשון
Lev 9:16 טז ויקרב את העלה ויעשה כמשפט
Lev 9:17 יז ויקרב את המנחה וימלא כפו ממנה ויקטר על המזבח--מלבד עלת הבקר
Lev 9:18 יח וישחט את השור ואת האיל זבח השלמים אשר לעם וימצאו בני אהרן את הדם אליו ויזרקהו על המזבח סביב
Lev 9:19 יט ואת החלבים מן השור ומן האיל--האליה והמכסה והכלית ויתרת הכבד
Lev 9:20 כ וישימו את החלבים על החזות ויקטר החלבים המזבחה
Lev 9:21 כא ואת החזות ואת שוק הימין הניף אהרן תנופה לפני יהוה--כאשר צוה משה
Lev 9:22 כב וישא אהרן את ידו אל העם ויברכם וירד מעשת החטאת והעלה--והשלמים
Lev 9:23 כג ויבא משה ואהרן אל אהל מועד ויצאו ויברכו את העם וירא כבוד יהוה אל כל העם
Lev 9:24 כד ותצא אש מלפני יהוה ותאכל על המזבח את העלה ואת החלבים וירא כל העם וירנו ויפלו על פניהם