Lev 7:1 א וזאת תורת האשם  קדש קדשים הוא
Lev 7:2 ב במקום אשר ישחטו את העלה ישחטו את האשם ואת דמו יזרק על המזבח סביב
Lev 7:3 ג ואת כל חלבו יקריב ממנו--את האליה ואת החלב המכסה את הקרב
Lev 7:4 ד ואת שתי הכלית ואת החלב אשר עליהן אשר על הכסלים ואת היתרת על הכבד על הכלית יסירנה
Lev 7:5 ה והקטיר אתם הכהן המזבחה אשה ליהוה אשם הוא
Lev 7:6 ו כל זכר בכהנים יאכלנו במקום קדוש יאכל קדש קדשים הוא
Lev 7:7 ז כחטאת כאשם--תורה אחת להם הכהן אשר יכפר בו לו יהיה
Lev 7:8 ח והכהן--המקריב את עלת איש  עור העלה אשר הקריב לכהן לו יהיה
Lev 7:9 ט וכל מנחה אשר תאפה בתנור וכל נעשה במרחשת ועל מחבת--לכהן המקריב אתה לו תהיה
Lev 7:10 י וכל מנחה בלולה בשמן וחרבה--לכל בני אהרן תהיה איש כאחיו  {פ}
Lev 7:11 יא וזאת תורת זבח השלמים אשר יקריב ליהוה
Lev 7:12 יב אם על תודה יקריבנו--והקריב על זבח התודה חלות מצות בלולת בשמן ורקיקי מצות משחים בשמן וסלת מרבכת חלת בלולת בשמן
Lev 7:13 יג על חלת לחם חמץ יקריב קרבנו על זבח תודת שלמיו
Lev 7:14 יד והקריב ממנו אחד מכל קרבן תרומה ליהוה לכהן הזרק את דם השלמים--לו יהיה
Lev 7:15 טו ובשר זבח תודת שלמיו--ביום קרבנו יאכל  לא יניח ממנו עד בקר
Lev 7:16 טז ואם נדר או נדבה זבח קרבנו--ביום הקריבו את זבחו יאכל וממחרת והנותר ממנו יאכל
Lev 7:17 יז והנותר מבשר הזבח--ביום השלישי באש ישרף
Lev 7:18 יח ואם האכל יאכל מבשר זבח שלמיו ביום השלישי לא ירצה--המקריב אתו לא יחשב לו פגול יהיה והנפש האכלת ממנו עונה תשא
Lev 7:19 יט והבשר אשר יגע בכל טמא לא יאכל--באש ישרף והבשר--כל טהור יאכל בשר
Lev 7:20 כ והנפש אשר תאכל בשר מזבח השלמים אשר ליהוה וטמאתו עליו--ונכרתה הנפש ההוא מעמיה
Lev 7:21 כא ונפש כי תגע בכל טמא בטמאת אדם או בבהמה טמאה או בכל שקץ טמא ואכל מבשר זבח השלמים אשר ליהוה--ונכרתה הנפש ההוא מעמיה  {פ}
Lev 7:22 כב וידבר יהוה אל משה לאמר
Lev 7:23 כג דבר אל בני ישראל לאמר  כל חלב שור וכשב ועז--לא תאכלו
Lev 7:24 כד וחלב נבלה וחלב טרפה יעשה לכל מלאכה ואכל לא תאכלהו
Lev 7:25 כה כי כל אכל חלב מן הבהמה אשר יקריב ממנה אשה ליהוה--ונכרתה הנפש האכלת מעמיה
Lev 7:26 כו וכל דם לא תאכלו בכל מושבתיכם לעוף ולבהמה
Lev 7:27 כז כל נפש אשר תאכל כל דם--ונכרתה הנפש ההוא מעמיה
Lev 7:28 כח וידבר יהוה אל משה לאמר
Lev 7:29 כט דבר אל בני ישראל לאמר  המקריב את זבח שלמיו ליהוה--יביא את קרבנו ליהוה מזבח שלמיו
Lev 7:30 ל ידיו תביאינה את אשי יהוה את החלב על החזה יביאנו--את החזה להניף אתו תנופה לפני יהוה
Lev 7:31 לא והקטיר הכהן את החלב המזבחה והיה החזה לאהרן ולבניו
Lev 7:32 לב ואת שוק הימין תתנו תרומה לכהן מזבחי שלמיכם
Lev 7:33 לג המקריב את דם השלמים ואת החלב--מבני אהרן  לו תהיה שוק הימין למנה
Lev 7:34 לד כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל
Lev 7:35 לה זאת משחת אהרן ומשחת בניו מאשי יהוה ביום הקריב אתם לכהן ליהוה
Lev 7:36 לו אשר צוה יהוה לתת להם ביום משחו אתם מאת בני ישראל--חקת עולם לדרתם
Lev 7:37 לז זאת התורה לעלה למנחה ולחטאת ולאשם ולמלואים--ולזבח השלמים
Lev 7:38 לח אשר צוה יהוה את משה בהר סיני  ביום צותו את בני ישראל להקריב את קרבניהם ליהוה--במדבר סיני  {פ}