Lev 6:1 א וידבר יהוה אל משה לאמר
Lev 6:2 ב צו את אהרן ואת בניו לאמר זאת תורת העלה  הוא העלה על מוקדה על המזבח כל הלילה עד הבקר ואש המזבח תוקד בו
Lev 6:3 ג ולבש הכהן מדו בד ומכנסי בד ילבש על בשרו והרים את הדשן אשר תאכל האש את העלה על המזבח ושמו אצל המזבח
Lev 6:4 ד ופשט את בגדיו ולבש בגדים אחרים והוציא את הדשן אל מחוץ למחנה אל מקום טהור
Lev 6:5 ה והאש על המזבח תוקד בו לא תכבה ובער עליה הכהן עצים בבקר בבקר וערך עליה העלה והקטיר עליה חלבי השלמים
Lev 6:6 ו אש תמיד תוקד על המזבח--לא תכבה  {ס}
Lev 6:7 ז וזאת תורת המנחה  הקרב אתה בני אהרן לפני יהוה אל פני המזבח
Lev 6:8 ח והרים ממנו בקמצו מסלת המנחה ומשמנה ואת כל הלבנה אשר על המנחה והקטיר המזבח ריח ניחח אזכרתה--ליהוה
Lev 6:9 ט והנותרת ממנה יאכלו אהרן ובניו מצות תאכל במקום קדש בחצר אהל מועד יאכלוה
Lev 6:10 י לא תאפה חמץ חלקם נתתי אתה מאשי קדש קדשים הוא כחטאת וכאשם
Lev 6:11 יא כל זכר בבני אהרן יאכלנה--חק עולם לדרתיכם מאשי יהוה כל אשר יגע בהם יקדש  {פ}
Lev 6:12 יב וידבר יהוה אל משה לאמר
Lev 6:13 יג זה קרבן אהרן ובניו אשר יקריבו ליהוה ביום המשח אתו--עשירת האפה סלת מנחה תמיד  מחציתה בבקר ומחציתה בערב
Lev 6:14 יד על מחבת בשמן תעשה--מרבכת תביאנה תפיני מנחת פתים תקריב ריח ניחח ליהוה
Lev 6:15 טו והכהן המשיח תחתיו מבניו יעשה אתה חק עולם ליהוה כליל תקטר
Lev 6:16 טז וכל מנחת כהן כליל תהיה לא תאכל  {פ}
Lev 6:17 יז וידבר יהוה אל משה לאמר
Lev 6:18 יח דבר אל אהרן ואל בניו לאמר זאת תורת החטאת  במקום אשר תשחט העלה תשחט החטאת לפני יהוה--קדש קדשים הוא
Lev 6:19 יט הכהן המחטא אתה יאכלנה במקום קדש תאכל בחצר אהל מועד
Lev 6:20 כ כל אשר יגע בבשרה יקדש ואשר יזה מדמה על הבגד--אשר יזה עליה תכבס במקום קדש
Lev 6:21 כא וכלי חרש אשר תבשל בו ישבר ואם בכלי נחשת בשלה ומרק ושטף במים
Lev 6:22 כב כל זכר בכהנים יאכל אתה קדש קדשים הוא
Lev 6:23 כג וכל חטאת אשר יובא מדמה אל אהל מועד לכפר בקדש--לא תאכל באש תשרף  {פ}
Lev 6:24
Lev 6:25
Lev 6:26
Lev 6:27
Lev 6:28
Lev 6:29
Lev 6:30