Lev 2:1 א ונפש כי תקריב קרבן מנחה ליהוה--סלת יהיה קרבנו ויצק עליה שמן ונתן עליה לבנה
Lev 2:2 ב והביאה אל בני אהרן הכהנים וקמץ משם מלא קמצו מסלתה ומשמנה על כל לבנתה והקטיר הכהן את אזכרתה המזבחה--אשה ריח ניחח ליהוה
Lev 2:3 ג והנותרת מן המנחה--לאהרן ולבניו  קדש קדשים מאשי יהוה  {ס}
Lev 2:4 ד וכי תקרב קרבן מנחה מאפה תנור--סלת חלות מצת בלולת בשמן ורקיקי מצות משחים בשמן  {ס}
Lev 2:5 ה ואם מנחה על המחבת קרבנך--סלת בלולה בשמן מצה תהיה
Lev 2:6 ו פתות אתה פתים ויצקת עליה שמן מנחה הוא  {ס}
Lev 2:7 ז ואם מנחת מרחשת קרבנך--סלת בשמן תעשה
Lev 2:8 ח והבאת את המנחה אשר יעשה מאלה--ליהוה והקריבה אל הכהן והגישה אל המזבח
Lev 2:9 ט והרים הכהן מן המנחה את אזכרתה והקטיר המזבחה--אשה ריח ניחח ליהוה
Lev 2:10 י והנותרת מן המנחה--לאהרן ולבניו  קדש קדשים מאשי יהוה
Lev 2:11 יא כל המנחה אשר תקריבו ליהוה--לא תעשה חמץ  כי כל שאר וכל דבש לא תקטירו ממנו אשה ליהוה
Lev 2:12 יב קרבן ראשית תקריבו אתם ליהוה ואל המזבח לא יעלו לריח ניחח
Lev 2:13 יג וכל קרבן מנחתך במלח תמלח ולא תשבית מלח ברית אלהיך מעל מנחתך על כל קרבנך תקריב מלח  {ס}
Lev 2:14 יד ואם תקריב מנחת בכורים ליהוה--אביב קלוי באש גרש כרמל תקריב את מנחת בכוריך
Lev 2:15 טו ונתת עליה שמן ושמת עליה לבנה מנחה הוא
Lev 2:16 טז והקטיר הכהן את אזכרתה מגרשה ומשמנה על כל לבנתה--אשה ליהוה  {פ}