Exo 40:1 א וידבר יהוה אל משה לאמר
Exo 40:2 ב ביום החדש הראשון באחד לחדש תקים את משכן אהל מועד
Exo 40:3 ג ושמת שם את ארון העדות וסכת על הארן את הפרכת
Exo 40:4 ד והבאת את השלחן וערכת את ערכו והבאת את המנרה והעלית את נרתיה
Exo 40:5 ה ונתתה את מזבח הזהב לקטרת לפני ארון העדת ושמת את מסך הפתח למשכן
Exo 40:6 ו ונתתה את מזבח העלה לפני פתח משכן אהל מועד
Exo 40:7 ז ונתת את הכיר בין אהל מועד ובין המזבח ונתת שם מים
Exo 40:8 ח ושמת את החצר סביב ונתת את מסך שער החצר
Exo 40:9 ט ולקחת את שמן המשחה ומשחת את המשכן ואת כל אשר בו וקדשת אתו ואת כל כליו והיה קדש
Exo 40:10 י ומשחת את מזבח העלה ואת כל כליו וקדשת את המזבח והיה המזבח קדש קדשים
Exo 40:11 יא ומשחת את הכיר ואת כנו וקדשת אתו
Exo 40:12 יב והקרבת את אהרן ואת בניו אל פתח אהל מועד ורחצת אתם במים
Exo 40:13 יג והלבשת את אהרן את בגדי הקדש ומשחת אתו וקדשת אתו וכהן לי
Exo 40:14 יד ואת בניו תקריב והלבשת אתם כתנת
Exo 40:15 טו ומשחת אתם כאשר משחת את אביהם וכהנו לי והיתה להית להם משחתם לכהנת עולם--לדרתם
Exo 40:16 טז ויעש משה  ככל אשר צוה יהוה אתו--כן עשה  {ס}
Exo 40:17 יז ויהי בחדש הראשון בשנה השנית--באחד לחדש  הוקם המשכן
Exo 40:18 יח ויקם משה את המשכן ויתן את אדניו וישם את קרשיו ויתן את בריחיו ויקם את עמודיו
Exo 40:19 יט ויפרש את האהל על המשכן וישם את מכסה האהל עליו מלמעלה--כאשר צוה יהוה את משה  {ס}
Exo 40:20 כ ויקח ויתן את העדת אל הארן וישם את הבדים על הארן ויתן את הכפרת על הארן מלמעלה
Exo 40:21 כא ויבא את הארן אל המשכן וישם את פרכת המסך ויסך על ארון העדות--כאשר צוה יהוה את משה  {ס}
Exo 40:22 כב ויתן את השלחן באהל מועד על ירך המשכן צפנה מחוץ לפרכת
Exo 40:23 כג ויערך עליו ערך לחם לפני יהוה--כאשר צוה יהוה את משה  {ס}
Exo 40:24 כד וישם את המנרה באהל מועד נכח השלחן על ירך המשכן נגבה
Exo 40:25 כה ויעל הנרת לפני יהוה--כאשר צוה יהוה את משה  {ס}
Exo 40:26 כו וישם את מזבח הזהב באהל מועד לפני הפרכת
Exo 40:27 כז ויקטר עליו קטרת סמים--כאשר צוה יהוה את משה  {ס}
Exo 40:28 כח וישם את מסך הפתח למשכן
Exo 40:29 כט ואת מזבח העלה שם פתח משכן אהל מועד ויעל עליו את העלה ואת המנחה--כאשר צוה יהוה את משה  {ס}
Exo 40:30 ל וישם את הכיר בין אהל מועד ובין המזבח ויתן שמה מים לרחצה
Exo 40:31 לא ורחצו ממנו משה ואהרן ובניו את ידיהם ואת רגליהם
Exo 40:32 לב בבאם אל אהל מועד ובקרבתם אל המזבח--ירחצו  כאשר צוה יהוה את משה  {ס}
Exo 40:33 לג ויקם את החצר סביב למשכן ולמזבח ויתן את מסך שער החצר ויכל משה את המלאכה  {פ}
Exo 40:34 לד ויכס הענן את אהל מועד וכבוד יהוה מלא את המשכן
Exo 40:35 לה ולא יכל משה לבוא אל אהל מועד--כי שכן עליו הענן וכבוד יהוה מלא את המשכן
Exo 40:36 לו ובהעלות הענן מעל המשכן יסעו בני ישראל בכל מסעיהם
Exo 40:37 לז ואם לא יעלה הענן--ולא יסעו עד יום העלתו
Exo 40:38 לח כי ענן יהוה על המשכן יומם ואש תהיה לילה בו--לעיני כל בית ישראל בכל מסעיהם  {ש}