Exo 36:1 א ועשה בצלאל ואהליאב וכל איש חכם לב אשר נתן יהוה חכמה ותבונה בהמה לדעת לעשת את כל מלאכת עבדת הקדש--לכל אשר צוה יהוה
Exo 36:2 ב ויקרא משה אל בצלאל ואל אהליאב ואל כל איש חכם לב אשר נתן יהוה חכמה בלבו--כל אשר נשאו לבו לקרבה אל המלאכה לעשת אתה
Exo 36:3 ג ויקחו מלפני משה את כל התרומה אשר הביאו בני ישראל למלאכת עבדת הקדש--לעשת אתה והם הביאו אליו עוד נדבה--בבקר בבקר
Exo 36:4 ד ויבאו כל החכמים העשים את כל מלאכת הקדש--איש איש ממלאכתו אשר המה עשים
Exo 36:5 ה ויאמרו אל משה לאמר מרבים העם להביא מדי העבדה למלאכה אשר צוה יהוה לעשת אתה
Exo 36:6 ו ויצו משה ויעבירו קול במחנה לאמר איש ואשה אל יעשו עוד מלאכה לתרומת הקדש ויכלא העם מהביא
Exo 36:7 ז והמלאכה היתה דים לכל המלאכה--לעשות אתה והותר  {ס}
Exo 36:8 ח ויעשו כל חכם לב בעשי המלאכה את המשכן--עשר יריעת  שש משזר ותכלת וארגמן ותולעת שני--כרבים מעשה חשב עשה אתם
Exo 36:9 ט ארך היריעה האחת שמנה ועשרים באמה ורחב ארבע באמה היריעה האחת  מדה אחת לכל היריעת
Exo 36:10 י ויחבר את חמש היריעת אחת אל אחת וחמש יריעת חבר אחת אל אחת
Exo 36:11 יא ויעש ללאת תכלת על שפת היריעה האחת מקצה במחברת כן עשה בשפת היריעה הקיצונה במחברת השנית
Exo 36:12 יב חמשים ללאת עשה ביריעה האחת וחמשים ללאת עשה בקצה היריעה אשר במחברת השנית  מקבילת הללאת--אחת אל אחת
Exo 36:13 יג ויעש חמשים קרסי זהב ויחבר את היריעת אחת אל אחת בקרסים ויהי המשכן אחד  {פ}
Exo 36:14 יד ויעש יריעת עזים לאהל על המשכן  עשתי עשרה יריעת עשה אתם
Exo 36:15 טו ארך היריעה האחת שלשים באמה וארבע אמות רחב היריעה האחת  מדה אחת לעשתי עשרה יריעת
Exo 36:16 טז ויחבר את חמש היריעת לבד ואת שש היריעת לבד
Exo 36:17 יז ויעש ללאת חמשים על שפת היריעה הקיצנה במחברת וחמשים ללאת עשה על שפת היריעה החברת השנית
Exo 36:18 יח ויעש קרסי נחשת חמשים לחבר את האהל להית אחד
Exo 36:19 יט ויעש מכסה לאהל ערת אילם מאדמים ומכסה ערת תחשים מלמעלה  {ס}
Exo 36:20 כ ויעש את הקרשים למשכן עצי שטים עמדים
Exo 36:21 כא עשר אמת ארך הקרש ואמה וחצי האמה רחב הקרש האחד
Exo 36:22 כב שתי ידת לקרש האחד משלבת אחת אל אחת כן עשה לכל קרשי המשכן
Exo 36:23 כג ויעש את הקרשים למשכן  עשרים קרשים לפאת נגב תימנה
Exo 36:24 כד וארבעים אדני כסף--עשה תחת עשרים הקרשים  שני אדנים תחת הקרש האחד לשתי ידתיו ושני אדנים תחת הקרש האחד לשתי ידתיו
Exo 36:25 כה ולצלע המשכן השנית לפאת צפון עשה עשרים קרשים
Exo 36:26 כו וארבעים אדניהם כסף--שני אדנים תחת הקרש האחד ושני אדנים תחת הקרש האחד
Exo 36:27 כז ולירכתי המשכן ימה עשה ששה קרשים
Exo 36:28 כח ושני קרשים עשה למקצעת המשכן--בירכתים
Exo 36:29 כט והיו תואמם מלמטה ויחדו יהיו תמים אל ראשו אל הטבעת האחת כן עשה לשניהם לשני המקצעת
Exo 36:30 ל והיו שמנה קרשים ואדניהם כסף ששה עשר אדנים--שני אדנים שני אדנים תחת הקרש האחד
Exo 36:31 לא ויעש בריחי עצי שטים--חמשה לקרשי צלע המשכן האחת
Exo 36:32 לב וחמשה בריחם לקרשי צלע המשכן השנית וחמשה בריחם לקרשי המשכן לירכתים ימה
Exo 36:33 לג ויעש את הבריח התיכן לברח בתוך הקרשים מן הקצה אל הקצה
Exo 36:34 לד ואת הקרשים צפה זהב ואת טבעתם עשה זהב--בתים לבריחם ויצף את הבריחם זהב
Exo 36:35 לה ויעש את הפרכת תכלת וארגמן ותולעת שני ושש משזר מעשה חשב עשה אתה כרבים
Exo 36:36 לו ויעש לה ארבעה עמודי שטים ויצפם זהב וויהם זהב ויצק להם ארבעה אדני כסף
Exo 36:37 לז ויעש מסך לפתח האהל תכלת וארגמן ותולעת שני ושש משזר מעשה רקם
Exo 36:38 לח ואת עמודיו חמשה ואת וויהם וצפה ראשיהם וחשקיהם זהב ואדניהם חמשה נחשת  {פ}