Exo 32:1 א וירא העם כי בשש משה לרדת מן ההר ויקהל העם על אהרן ויאמרו אליו קום עשה לנו אלהים אשר ילכו לפנינו--כי זה משה האיש אשר העלנו מארץ מצרים לא ידענו מה היה לו
Exo 32:2 ב ויאמר אלהם אהרן פרקו נזמי הזהב אשר באזני נשיכם בניכם ובנתיכם והביאו אלי
Exo 32:3 ג ויתפרקו כל העם את נזמי הזהב אשר באזניהם ויביאו אל אהרן
Exo 32:4 ד ויקח מידם ויצר אתו בחרט ויעשהו עגל מסכה ויאמרו--אלה אלהיך ישראל אשר העלוך מארץ מצרים
Exo 32:5 ה וירא אהרן ויבן מזבח לפניו ויקרא אהרן ויאמר חג ליהוה מחר
Exo 32:6 ו וישכימו ממחרת ויעלו עלת ויגשו שלמים וישב העם לאכל ושתו ויקמו לצחק  {פ}
Exo 32:7 ז וידבר יהוה אל משה  לך רד--כי שחת עמך אשר העלית מארץ מצרים
Exo 32:8 ח סרו מהר מן הדרך אשר צויתם--עשו להם עגל מסכה וישתחוו לו ויזבחו לו ויאמרו אלה אלהיך ישראל אשר העלוך מארץ מצרים
Exo 32:9 ט ויאמר יהוה אל משה  ראיתי את העם הזה והנה עם קשה ערף הוא
Exo 32:10 י ועתה הניחה לי ויחר אפי בהם ואכלם ואעשה אותך לגוי גדול
Exo 32:11 יא ויחל משה את פני יהוה אלהיו ויאמר למה יהוה יחרה אפך בעמך אשר הוצאת מארץ מצרים בכח גדול וביד חזקה
Exo 32:12 יב למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שוב מחרון אפך והנחם על הרעה לעמך
Exo 32:13 יג זכר לאברהם ליצחק ולישראל עבדיך אשר נשבעת להם בך ותדבר אלהם ארבה את זרעכם ככוכבי השמים וכל הארץ הזאת אשר אמרתי אתן לזרעכם ונחלו לעלם
Exo 32:14 יד וינחם יהוה על הרעה אשר דבר לעשות לעמו  {פ}
Exo 32:15 טו ויפן וירד משה מן ההר ושני לחת העדת בידו  לחת כתבים משני עבריהם--מזה ומזה הם כתבים
Exo 32:16 טז והלחת--מעשה אלהים המה והמכתב מכתב אלהים הוא--חרות על הלחת
Exo 32:17 יז וישמע יהושע את קול העם ברעה ויאמר אל משה קול מלחמה במחנה
Exo 32:18 יח ויאמר אין קול ענות גבורה ואין קול ענות חלושה קול ענות אנכי שמע
Exo 32:19 יט ויהי כאשר קרב אל המחנה וירא את העגל ומחלת ויחר אף משה וישלך מידו את הלחת וישבר אתם תחת ההר
Exo 32:20 כ ויקח את העגל אשר עשו וישרף באש ויטחן עד אשר דק ויזר על פני המים וישק את בני ישראל
Exo 32:21 כא ויאמר משה אל אהרן מה עשה לך העם הזה  כי הבאת עליו חטאה גדלה
Exo 32:22 כב ויאמר אהרן אל יחר אף אדני אתה ידעת את העם כי ברע הוא
Exo 32:23 כג ויאמרו לי--עשה לנו אלהים אשר ילכו לפנינו  כי זה משה האיש אשר העלנו מארץ מצרים--לא ידענו מה היה לו
Exo 32:24 כד ואמר להם למי זהב התפרקו ויתנו לי ואשלכהו באש ויצא העגל הזה
Exo 32:25 כה וירא משה את העם כי פרע הוא  כי פרעה אהרן לשמצה בקמיהם
Exo 32:26 כו ויעמד משה בשער המחנה ויאמר מי ליהוה אלי ויאספו אליו כל בני לוי
Exo 32:27 כז ויאמר להם כה אמר יהוה אלהי ישראל שימו איש חרבו על ירכו עברו ושובו משער לשער במחנה והרגו איש את אחיו ואיש את רעהו ואיש את קרבו
Exo 32:28 כח ויעשו בני לוי כדבר משה ויפל מן העם ביום ההוא כשלשת אלפי איש
Exo 32:29 כט ויאמר משה מלאו ידכם היום ליהוה כי איש בבנו ובאחיו--ולתת עליכם היום ברכה
Exo 32:30 ל ויהי ממחרת ויאמר משה אל העם אתם חטאתם חטאה גדלה ועתה אעלה אל יהוה אולי אכפרה בעד חטאתכם
Exo 32:31 לא וישב משה אל יהוה ויאמר  אנא חטא העם הזה חטאה גדלה ויעשו להם אלהי זהב
Exo 32:32 לב ועתה אם תשא חטאתם ואם אין--מחני נא מספרך אשר כתבת
Exo 32:33 לג ויאמר יהוה אל משה  מי אשר חטא לי אמחנו מספרי
Exo 32:34 לד ועתה לך נחה את העם אל אשר דברתי לך--הנה מלאכי ילך לפניך וביום פקדי ופקדתי עלהם חטאתם
Exo 32:35 לה ויגף יהוה את העם על אשר עשו את העגל אשר עשה אהרן  {ס}