Exo 31:1 א וידבר יהוה אל משה לאמר
Exo 31:2 ב ראה קראתי בשם בצלאל בן אורי בן חור למטה יהודה
Exo 31:3 ג ואמלא אתו רוח אלהים בחכמה ובתבונה ובדעת ובכל מלאכה
Exo 31:4 ד לחשב מחשבת לעשות בזהב ובכסף ובנחשת
Exo 31:5 ה ובחרשת אבן למלאת ובחרשת עץ לעשות בכל מלאכה
Exo 31:6 ו ואני הנה נתתי אתו את אהליאב בן אחיסמך למטה דן ובלב כל חכם לב נתתי חכמה ועשו את כל אשר צויתך
Exo 31:7 ז את אהל מועד ואת הארן לעדת ואת הכפרת אשר עליו ואת כל כלי האהל
Exo 31:8 ח ואת השלחן ואת כליו ואת המנרה הטהרה ואת כל כליה ואת מזבח הקטרת
Exo 31:9 ט ואת מזבח העלה ואת כל כליו ואת הכיור ואת כנו
Exo 31:10 י ואת בגדי השרד ואת בגדי הקדש לאהרן הכהן ואת בגדי בניו לכהן
Exo 31:11 יא ואת שמן המשחה ואת קטרת הסמים לקדש  ככל אשר צויתך יעשו  {פ}
Exo 31:12 יב ויאמר יהוה אל משה לאמר
Exo 31:13 יג ואתה דבר אל בני ישראל לאמר אך את שבתתי תשמרו  כי אות הוא ביני וביניכם לדרתיכם--לדעת כי אני יהוה מקדשכם
Exo 31:14 יד ושמרתם את השבת כי קדש הוא לכם מחלליה מות יומת--כי כל העשה בה מלאכה ונכרתה הנפש ההוא מקרב עמיה
Exo 31:15 טו ששת ימים יעשה מלאכה וביום השביעי שבת שבתון קדש ליהוה כל העשה מלאכה ביום השבת מות יומת
Exo 31:16 טז ושמרו בני ישראל את השבת לעשות את השבת לדרתם ברית עולם
Exo 31:17 יז ביני ובין בני ישראל--אות הוא לעלם  כי ששת ימים עשה יהוה את השמים ואת הארץ וביום השביעי שבת וינפש  {ס}
Exo 31:18 יח ויתן אל משה ככלתו לדבר אתו בהר סיני שני לחת העדת--לחת אבן כתבים באצבע אלהים