Exo 30:1 א ועשית מזבח מקטר קטרת עצי שטים תעשה אתו
Exo 30:2 ב אמה ארכו ואמה רחבו רבוע יהיה ואמתים קמתו ממנו קרנתיו
Exo 30:3 ג וצפית אתו זהב טהור את גגו ואת קירתיו סביב--ואת קרנתיו ועשית לו זר זהב סביב
Exo 30:4 ד ושתי טבעת זהב תעשה לו מתחת לזרו על שתי צלעתיו--תעשה על שני צדיו והיה לבתים לבדים לשאת אתו בהמה
Exo 30:5 ה ועשית את הבדים עצי שטים וצפית אתם זהב
Exo 30:6 ו ונתתה אתו לפני הפרכת אשר על ארן העדת--לפני הכפרת אשר על העדת אשר אועד לך שמה
Exo 30:7 ז והקטיר עליו אהרן קטרת סמים בבקר בבקר בהיטיבו את הנרת--יקטירנה
Exo 30:8 ח ובהעלת אהרן את הנרת בין הערבים יקטירנה--קטרת תמיד לפני יהוה לדרתיכם
Exo 30:9 ט לא תעלו עליו קטרת זרה ועלה ומנחה ונסך לא תסכו עליו
Exo 30:10 י וכפר אהרן על קרנתיו אחת בשנה  מדם חטאת הכפרים אחת בשנה יכפר עליו לדרתיכם--קדש קדשים הוא ליהוה  {פ}
Exo 30:11 יא וידבר יהוה אל משה לאמר
Exo 30:12 יב כי תשא את ראש בני ישראל לפקדיהם ונתנו איש כפר נפשו ליהוה בפקד אתם ולא יהיה בהם נגף בפקד אתם
Exo 30:13 יג זה יתנו כל העבר על הפקדים--מחצית השקל בשקל הקדש  עשרים גרה השקל--מחצית השקל תרומה ליהוה
Exo 30:14 יד כל העבר על הפקדים מבן עשרים שנה ומעלה--יתן תרומת יהוה
Exo 30:15 טו העשיר לא ירבה והדל לא ימעיט ממחצית השקל--לתת את תרומת יהוה לכפר על נפשתיכם
Exo 30:16 טז ולקחת את כסף הכפרים מאת בני ישראל ונתת אתו על עבדת אהל מועד והיה לבני ישראל לזכרון לפני יהוה לכפר על נפשתיכם  {פ}
Exo 30:17 יז וידבר יהוה אל משה לאמר
Exo 30:18 יח ועשית כיור נחשת וכנו נחשת--לרחצה ונתת אתו בין אהל מועד ובין המזבח ונתת שמה מים
Exo 30:19 יט ורחצו אהרן ובניו ממנו את ידיהם ואת רגליהם
Exo 30:20 כ בבאם אל אהל מועד ירחצו מים--ולא ימתו או בגשתם אל המזבח לשרת להקטיר אשה ליהוה
Exo 30:21 כא ורחצו ידיהם ורגליהם ולא ימתו והיתה להם חק עולם לו ולזרעו לדרתם  {פ}
Exo 30:22 כב וידבר יהוה אל משה לאמר
Exo 30:23 כג ואתה קח לך בשמים ראש מר דרור חמש מאות וקנמן בשם מחציתו חמשים ומאתים וקנה בשם חמשים ומאתים
Exo 30:24 כד וקדה חמש מאות בשקל הקדש ושמן זית הין
Exo 30:25 כה ועשית אתו שמן משחת קדש--רקח מרקחת מעשה רקח שמן משחת קדש יהיה
Exo 30:26 כו ומשחת בו את אהל מועד ואת ארון העדת
Exo 30:27 כז ואת השלחן ואת כל כליו ואת המנרה ואת כליה ואת מזבח הקטרת
Exo 30:28 כח ואת מזבח העלה ואת כל כליו ואת הכיר ואת כנו
Exo 30:29 כט וקדשת אתם והיו קדש קדשים כל הנגע בהם יקדש
Exo 30:30 ל ואת אהרן ואת בניו תמשח וקדשת אתם לכהן לי
Exo 30:31 לא ואל בני ישראל תדבר לאמר  שמן משחת קדש יהיה זה לי--לדרתיכם
Exo 30:32 לב על בשר אדם לא ייסך ובמתכנתו לא תעשו כמהו קדש הוא קדש יהיה לכם
Exo 30:33 לג איש אשר ירקח כמהו ואשר יתן ממנו על זר--ונכרת מעמיו  {ס}
Exo 30:34 לד ויאמר יהוה אל משה קח לך סמים נטף ושחלת וחלבנה סמים ולבנה זכה  בד בבד יהיה
Exo 30:35 לה ועשית אתה קטרת רקח מעשה רוקח ממלח טהור קדש
Exo 30:36 לו ושחקת ממנה הדק ונתתה ממנה לפני העדת באהל מועד אשר אועד לך שמה קדש קדשים תהיה לכם
Exo 30:37 לז והקטרת אשר תעשה--במתכנתה לא תעשו לכם קדש תהיה לך ליהוה
Exo 30:38 לח איש אשר יעשה כמוה להריח בה--ונכרת מעמיו  {ס}