Exo 21:1 א ואלה המשפטים אשר תשים לפניהם
Exo 21:2 ב כי תקנה עבד עברי שש שנים יעבד ובשבעת--יצא לחפשי חנם
Exo 21:3 ג אם בגפו יבא בגפו יצא אם בעל אשה הוא ויצאה אשתו עמו
Exo 21:4 ד אם אדניו יתן לו אשה וילדה לו בנים או בנות--האשה וילדיה תהיה לאדניה והוא יצא בגפו
Exo 21:5 ה ואם אמר יאמר העבד אהבתי את אדני את אשתי ואת בני לא אצא חפשי
Exo 21:6 ו והגישו אדניו אל האלהים והגישו אל הדלת או אל המזוזה ורצע אדניו את אזנו במרצע ועבדו לעלם  {ס}
Exo 21:7 ז וכי ימכר איש את בתו לאמה--לא תצא כצאת העבדים
Exo 21:8 ח אם רעה בעיני אדניה אשר לא (לו) יעדה--והפדה  לעם נכרי לא ימשל למכרה בבגדו בה
Exo 21:9 ט ואם לבנו ייעדנה--כמשפט הבנות יעשה לה
Exo 21:10 י אם אחרת יקח לו--שארה כסותה וענתה לא יגרע
Exo 21:11 יא ואם שלש אלה--לא יעשה לה  ויצאה חנם אין כסף  {ס}
Exo 21:12 יב מכה איש ומת מות יומת
Exo 21:13 יג ואשר לא צדה והאלהים אנה לידו--ושמתי לך מקום אשר ינוס שמה  {ס}
Exo 21:14 יד וכי יזד איש על רעהו להרגו בערמה--מעם מזבחי תקחנו למות  {ס}
Exo 21:15 טו ומכה אביו ואמו מות יומת  {ס}
Exo 21:16 טז וגנב איש ומכרו ונמצא בידו מות יומת  {ס}
Exo 21:17 יז ומקלל אביו ואמו מות יומת  {ס}
Exo 21:18 יח וכי יריבן אנשים--והכה איש את רעהו באבן או באגרף ולא ימות ונפל למשכב
Exo 21:19 יט אם יקום והתהלך בחוץ על משענתו--ונקה המכה  רק שבתו יתן ורפא ירפא  {ס}
Exo 21:20 כ וכי יכה איש את עבדו או את אמתו בשבט ומת תחת ידו--נקם ינקם
Exo 21:21 כא אך אם יום או יומים יעמד--לא יקם כי כספו הוא  {ס}
Exo 21:22 כב וכי ינצו אנשים ונגפו אשה הרה ויצאו ילדיה ולא יהיה אסון--ענוש יענש כאשר ישית עליו בעל האשה ונתן בפללים
Exo 21:23 כג ואם אסון יהיה--ונתתה נפש תחת נפש
Exo 21:24 כד עין תחת עין שן תחת שן יד תחת יד רגל תחת רגל
Exo 21:25 כה כויה תחת כויה פצע תחת פצע חבורה תחת חבורה  {ס}
Exo 21:26 כו וכי יכה איש את עין עבדו או את עין אמתו--ושחתה  לחפשי ישלחנו תחת עינו
Exo 21:27 כז ואם שן עבדו או שן אמתו יפיל--לחפשי ישלחנו תחת שנו  {פ}
Exo 21:28 כח וכי יגח שור את איש או את אשה ומת--סקול יסקל השור ולא יאכל את בשרו ובעל השור נקי
Exo 21:29 כט ואם שור נגח הוא מתמל שלשם והועד בבעליו ולא ישמרנו והמית איש או אשה--השור יסקל וגם בעליו יומת
Exo 21:30 ל אם כפר יושת עליו--ונתן פדין נפשו ככל אשר יושת עליו
Exo 21:31 לא או בן יגח או בת יגח--כמשפט הזה יעשה לו
Exo 21:32 לב אם עבד יגח השור או אמה--כסף שלשים שקלים יתן לאדניו והשור יסקל  {ס}
Exo 21:33 לג וכי יפתח איש בור או כי יכרה איש בר--ולא יכסנו ונפל שמה שור או חמור
Exo 21:34 לד בעל הבור ישלם כסף ישיב לבעליו והמת יהיה לו  {ס}
Exo 21:35 לה וכי יגף שור איש את שור רעהו ומת--ומכרו את השור החי וחצו את כספו וגם את המת יחצון
Exo 21:36 לו או נודע כי שור נגח הוא מתמול שלשם ולא ישמרנו בעליו--שלם ישלם שור תחת השור והמת יהיה לו  {ס} [ (Exodus 21:37) לז כי יגנב איש שור או שה וטבחו או מכרו--חמשה בקר ישלם תחת השור וארבע צאן תחת השה ]