Gen 46:1 א ויסע ישראל וכל אשר לו ויבא בארה שבע ויזבח זבחים לאלהי אביו יצחק
Gen 46:2 ב ויאמר אלהים לישראל במראת הלילה ויאמר יעקב יעקב ויאמר הנני
Gen 46:3 ג ויאמר אנכי האל אלהי אביך אל תירא מרדה מצרימה כי לגוי גדול אשימך שם
Gen 46:4 ד אנכי ארד עמך מצרימה ואנכי אעלך גם עלה ויוסף ישית ידו על עיניך
Gen 46:5 ה ויקם יעקב מבאר שבע וישאו בני ישראל את יעקב אביהם ואת טפם ואת נשיהם בעגלות אשר שלח פרעה לשאת אתו
Gen 46:6 ו ויקחו את מקניהם ואת רכושם אשר רכשו בארץ כנען ויבאו מצרימה  יעקב וכל זרעו אתו
Gen 46:7 ז בניו ובני בניו אתו בנתיו ובנות בניו וכל זרעו--הביא אתו מצרימה  {ס}
Gen 46:8 ח ואלה שמות בני ישראל הבאים מצרימה יעקב ובניו  בכר יעקב ראובן
Gen 46:9 ט ובני ראובן--חנוך ופלוא וחצרן וכרמי
Gen 46:10 י ובני שמעון ימואל וימין ואהד--ויכין וצחר ושאול בן הכנענית
Gen 46:11 יא ובני לוי--גרשון קהת ומררי
Gen 46:12 יב ובני יהודה ער ואונן ושלה--ופרץ וזרח וימת ער ואונן בארץ כנען ויהיו בני פרץ חצרן וחמול
Gen 46:13 יג ובני יששכר--תולע ופוה ויוב ושמרן
Gen 46:14 יד ובני זבלון--סרד ואלון ויחלאל
Gen 46:15 טו אלה בני לאה אשר ילדה ליעקב בפדן ארם ואת דינה בתו  כל נפש בניו ובנותיו שלשים ושלש
Gen 46:16 טז ובני גד צפיון וחגי שוני ואצבן ערי וארודי ואראלי
Gen 46:17 יז ובני אשר ימנה וישוה וישוי ובריעה--ושרח אחתם ובני בריעה חבר ומלכיאל
Gen 46:18 יח אלה בני זלפה אשר נתן לבן ללאה בתו ותלד את אלה ליעקב שש עשרה נפש
Gen 46:19 יט בני רחל אשת יעקב יוסף ובנימן
Gen 46:20 כ ויולד ליוסף בארץ מצרים אשר ילדה לו אסנת בת פוטי פרע כהן אן--את מנשה ואת אפרים
Gen 46:21 כא ובני בנימן בלע ובכר ואשבל גרא ונעמן אחי וראש מפים וחפים וארד
Gen 46:22 כב אלה בני רחל אשר ילד ליעקב--כל נפש ארבעה עשר
Gen 46:23 כג ובני דן חשים
Gen 46:24 כד ובני נפתלי--יחצאל וגוני ויצר ושלם
Gen 46:25 כה אלה בני בלהה אשר נתן לבן לרחל בתו ותלד את אלה ליעקב כל נפש שבעה
Gen 46:26 כו כל הנפש הבאה ליעקב מצרימה יצאי ירכו מלבד נשי בני יעקב--כל נפש ששים ושש
Gen 46:27 כז ובני יוסף אשר ילד לו במצרים נפש שנים  כל הנפש לבית יעקב הבאה מצרימה שבעים  {ס}
Gen 46:28 כח ואת יהודה שלח לפניו אל יוסף להורת לפניו גשנה ויבאו ארצה גשן
Gen 46:29 כט ויאסר יוסף מרכבתו ויעל לקראת ישראל אביו גשנה וירא אליו ויפל על צואריו ויבך על צואריו עוד
Gen 46:30 ל ויאמר ישראל אל יוסף אמותה הפעם אחרי ראותי את פניך כי עודך חי
Gen 46:31 לא ויאמר יוסף אל אחיו ואל בית אביו אעלה ואגידה לפרעה ואמרה אליו אחי ובית אבי אשר בארץ כנען באו אלי
Gen 46:32 לב והאנשים רעי צאן כי אנשי מקנה היו וצאנם ובקרם וכל אשר להם הביאו
Gen 46:33 לג והיה כי יקרא לכם פרעה ואמר מה מעשיכם
Gen 46:34 לד ואמרתם אנשי מקנה היו עבדיך מנעורינו ועד עתה--גם אנחנו גם אבתינו  בעבור תשבו בארץ גשן כי תועבת מצרים כל רעה צאן