Gen 41:1 א ויהי מקץ שנתים ימים ופרעה חלם והנה עמד על היאר
Gen 41:2 ב והנה מן היאר עלת שבע פרות יפות מראה ובריאת בשר ותרעינה באחו
Gen 41:3 ג והנה שבע פרות אחרות עלות אחריהן מן היאר רעות מראה ודקות בשר ותעמדנה אצל הפרות על שפת היאר
Gen 41:4 ד ותאכלנה הפרות רעות המראה ודקת הבשר את שבע הפרות יפת המראה והבריאת וייקץ פרעה
Gen 41:5 ה ויישן ויחלם שנית והנה שבע שבלים עלות בקנה אחד--בריאות וטבות
Gen 41:6 ו והנה שבע שבלים דקות ושדופת קדים--צמחות אחריהן
Gen 41:7 ז ותבלענה השבלים הדקות את שבע השבלים הבריאות והמלאות וייקץ פרעה והנה חלום
Gen 41:8 ח ויהי בבקר ותפעם רוחו וישלח ויקרא את כל חרטמי מצרים ואת כל חכמיה ויספר פרעה להם את חלמו ואין פותר אותם לפרעה
Gen 41:9 ט וידבר שר המשקים את פרעה לאמר  את חטאי אני מזכיר היום
Gen 41:10 י פרעה קצף על עבדיו ויתן אתי במשמר בית שר הטבחים--אתי ואת שר האפים
Gen 41:11 יא ונחלמה חלום בלילה אחד אני והוא  איש כפתרון חלמו חלמנו
Gen 41:12 יב ושם אתנו נער עברי עבד לשר הטבחים ונספר לו ויפתר לנו את חלמתינו  איש כחלמו פתר
Gen 41:13 יג ויהי כאשר פתר לנו כן היה  אתי השיב על כני ואתו תלה
Gen 41:14 יד וישלח פרעה ויקרא את יוסף ויריצהו מן הבור ויגלח ויחלף שמלתיו ויבא אל פרעה
Gen 41:15 טו ויאמר פרעה אל יוסף חלום חלמתי ופתר אין אתו ואני שמעתי עליך לאמר תשמע חלום לפתר אתו
Gen 41:16 טז ויען יוסף את פרעה לאמר בלעדי  אלהים יענה את שלום פרעה
Gen 41:17 יז וידבר פרעה אל יוסף  בחלמי הנני עמד על שפת היאר
Gen 41:18 יח והנה מן היאר עלת שבע פרות בריאות בשר ויפת תאר ותרעינה באחו
Gen 41:19 יט והנה שבע פרות אחרות עלות אחריהן דלות ורעות תאר מאד ורקות בשר  לא ראיתי כהנה בכל ארץ מצרים לרע
Gen 41:20 כ ותאכלנה הפרות הרקות והרעות--את שבע הפרות הראשנות הבריאת
Gen 41:21 כא ותבאנה אל קרבנה ולא נודע כי באו אל קרבנה ומראיהן רע כאשר בתחלה ואיקץ
Gen 41:22 כב וארא בחלמי והנה שבע שבלים עלת בקנה אחד--מלאת וטבות
Gen 41:23 כג והנה שבע שבלים צנמות דקות שדפות קדים--צמחות אחריהם
Gen 41:24 כד ותבלען השבלים הדקת את שבע השבלים הטבות ואמר אל החרטמים ואין מגיד לי
Gen 41:25 כה ויאמר יוסף אל פרעה חלום פרעה אחד הוא  את אשר האלהים עשה הגיד לפרעה
Gen 41:26 כו שבע פרת הטבת שבע שנים הנה ושבע השבלים הטבת שבע שנים הנה  חלום אחד הוא
Gen 41:27 כז ושבע הפרות הרקות והרעת העלת אחריהן שבע שנים הנה ושבע השבלים הרקות שדפות הקדים--יהיו שבע שני רעב
Gen 41:28 כח הוא הדבר אשר דברתי אל פרעה  אשר האלהים עשה הראה את פרעה
Gen 41:29 כט הנה שבע שנים באות--שבע גדול בכל ארץ מצרים
Gen 41:30 ל וקמו שבע שני רעב אחריהן ונשכח כל השבע בארץ מצרים וכלה הרעב את הארץ
Gen 41:31 לא ולא יודע השבע בארץ מפני הרעב ההוא אחרי כן  כי כבד הוא מאד
Gen 41:32 לב ועל השנות החלום אל פרעה פעמים--כי נכון הדבר מעם האלהים וממהר האלהים לעשתו
Gen 41:33 לג ועתה ירא פרעה איש נבון וחכם וישיתהו על ארץ מצרים
Gen 41:34 לד יעשה פרעה ויפקד פקדים על הארץ וחמש את ארץ מצרים בשבע שני השבע
Gen 41:35 לה ויקבצו את כל אכל השנים הטבות הבאת האלה ויצברו בר תחת יד פרעה אכל בערים--ושמרו
Gen 41:36 לו והיה האכל לפקדון לארץ לשבע שני הרעב אשר תהיין בארץ מצרים ולא תכרת הארץ ברעב
Gen 41:37 לז וייטב הדבר בעיני פרעה ובעיני כל עבדיו
Gen 41:38 לח ויאמר פרעה אל עבדיו  הנמצא כזה--איש אשר רוח אלהים בו
Gen 41:39 לט ויאמר פרעה אל יוסף אחרי הודיע אלהים אותך את כל זאת אין נבון וחכם כמוך
Gen 41:40 מ אתה תהיה על ביתי ועל פיך ישק כל עמי רק הכסא אגדל ממך
Gen 41:41 מא ויאמר פרעה אל יוסף  ראה נתתי אתך על כל ארץ מצרים
Gen 41:42 מב ויסר פרעה את טבעתו מעל ידו ויתן אתה על יד יוסף וילבש אתו בגדי שש וישם רבד הזהב על צוארו
Gen 41:43 מג וירכב אתו במרכבת המשנה אשר לו ויקראו לפניו אברך ונתון אתו על כל ארץ מצרים
Gen 41:44 מד ויאמר פרעה אל יוסף אני פרעה ובלעדיך לא ירים איש את ידו ואת רגלו--בכל ארץ מצרים
Gen 41:45 מה ויקרא פרעה שם יוסף צפנת פענח ויתן לו את אסנת בת פוטי פרע כהן אן לאשה ויצא יוסף על ארץ מצרים
Gen 41:46 מו ויוסף בן שלשים שנה בעמדו לפני פרעה מלך מצרים ויצא יוסף מלפני פרעה ויעבר בכל ארץ מצרים
Gen 41:47 מז ותעש הארץ בשבע שני השבע--לקמצים
Gen 41:48 מח ויקבץ את כל אכל שבע שנים אשר היו בארץ מצרים ויתן אכל בערים  אכל שדה העיר אשר סביבתיה נתן בתוכה
Gen 41:49 מט ויצבר יוסף בר כחול הים הרבה מאד--עד כי חדל לספר כי אין מספר
Gen 41:50 נ וליוסף ילד שני בנים בטרם תבוא שנת הרעב אשר ילדה לו אסנת בת פוטי פרע כהן און
Gen 41:51 נא ויקרא יוסף את שם הבכור מנשה  כי נשני אלהים את כל עמלי ואת כל בית אבי
Gen 41:52 נב ואת שם השני קרא אפרים  כי הפרני אלהים בארץ עניי
Gen 41:53 נג ותכלינה שבע שני השבע אשר היה בארץ מצרים
Gen 41:54 נד ותחלינה שבע שני הרעב לבוא כאשר אמר יוסף ויהי רעב בכל הארצות ובכל ארץ מצרים היה לחם
Gen 41:55 נה ותרעב כל ארץ מצרים ויצעק העם אל פרעה ללחם ויאמר פרעה לכל מצרים לכו אל יוסף אשר יאמר לכם תעשו
Gen 41:56 נו והרעב היה על כל פני הארץ ויפתח יוסף את כל אשר בהם וישבר למצרים ויחזק הרעב בארץ מצרים
Gen 41:57 נז וכל הארץ באו מצרימה לשבר אל יוסף  כי חזק הרעב בכל הארץ