Gen 40:1 א ויהי אחר הדברים האלה חטאו משקה מלך מצרים והאפה--לאדניהם למלך מצרים
Gen 40:2 ב ויקצף פרעה על שני סריסיו--על שר המשקים ועל שר האופים
Gen 40:3 ג ויתן אתם במשמר בית שר הטבחים--אל בית הסהר  מקום אשר יוסף אסור שם
Gen 40:4 ד ויפקד שר הטבחים את יוסף אתם--וישרת אתם ויהיו ימים במשמר
Gen 40:5 ה ויחלמו חלום שניהם איש חלמו בלילה אחד--איש כפתרון חלמו  המשקה והאפה אשר למלך מצרים אשר אסורים בבית הסהר
Gen 40:6 ו ויבא אליהם יוסף בבקר וירא אתם והנם זעפים
Gen 40:7 ז וישאל את סריסי פרעה אשר אתו במשמר בית אדניו--לאמר  מדוע פניכם רעים היום
Gen 40:8 ח ויאמרו אליו--חלום חלמנו ופתר אין אתו ויאמר אלהם יוסף הלוא לאלהים פתרנים--ספרו נא לי
Gen 40:9 ט ויספר שר המשקים את חלמו ליוסף ויאמר לו--בחלומי והנה גפן לפני
Gen 40:10 י ובגפן שלשה שריגם והוא כפרחת עלתה נצה הבשילו אשכלתיה ענבים
Gen 40:11 יא וכוס פרעה בידי ואקח את הענבים ואשחט אתם אל כוס פרעה ואתן את הכוס על כף פרעה
Gen 40:12 יב ויאמר לו יוסף זה פתרנו  שלשת השרגים--שלשת ימים הם
Gen 40:13 יג בעוד שלשת ימים ישא פרעה את ראשך והשיבך על כנך ונתת כוס פרעה בידו כמשפט הראשון אשר היית משקהו
Gen 40:14 יד כי אם זכרתני אתך כאשר ייטב לך ועשית נא עמדי חסד והזכרתני אל פרעה והוצאתני מן הבית הזה
Gen 40:15 טו כי גנב גנבתי מארץ העברים וגם פה לא עשיתי מאומה כי שמו אתי בבור
Gen 40:16 טז וירא שר האפים כי טוב פתר ויאמר אל יוסף אף אני בחלומי והנה שלשה סלי חרי על ראשי
Gen 40:17 יז ובסל העליון מכל מאכל פרעה--מעשה אפה והעוף אכל אתם מן הסל--מעל ראשי
Gen 40:18 יח ויען יוסף ויאמר זה פתרנו  שלשת הסלים--שלשת ימים הם
Gen 40:19 יט בעוד שלשת ימים ישא פרעה את ראשך מעליך ותלה אותך על עץ ואכל העוף את בשרך מעליך
Gen 40:20 כ ויהי ביום השלישי יום הלדת את פרעה ויעש משתה לכל עבדיו וישא את ראש שר המשקים ואת ראש שר האפים--בתוך עבדיו
Gen 40:21 כא וישב את שר המשקים על משקהו ויתן הכוס על כף פרעה
Gen 40:22 כב ואת שר האפים תלה  כאשר פתר להם יוסף
Gen 40:23 כג ולא זכר שר המשקים את יוסף וישכחהו  {פ}