Gen 34:1 א ותצא דינה בת לאה אשר ילדה ליעקב לראות בבנות הארץ
Gen 34:2 ב וירא אתה שכם בן חמור החוי--נשיא הארץ ויקח אתה וישכב אתה ויענה
Gen 34:3 ג ותדבק נפשו בדינה בת יעקב ויאהב את הנער וידבר על לב הנער
Gen 34:4 ד ויאמר שכם אל חמור אביו לאמר  קח לי את הילדה הזאת לאשה
Gen 34:5 ה ויעקב שמע כי טמא את דינה בתו ובניו היו את מקנהו בשדה והחרש יעקב עד באם
Gen 34:6 ו ויצא חמור אבי שכם אל יעקב לדבר אתו
Gen 34:7 ז ובני יעקב באו מן השדה כשמעם ויתעצבו האנשים ויחר להם מאד  כי נבלה עשה בישראל לשכב את בת יעקב וכן לא יעשה
Gen 34:8 ח וידבר חמור אתם לאמר  שכם בני חשקה נפשו בבתכם--תנו נא אתה לו לאשה
Gen 34:9 ט והתחתנו אתנו  בנתיכם תתנו לנו ואת בנתינו תקחו לכם
Gen 34:10 י ואתנו תשבו והארץ תהיה לפניכם--שבו וסחרוה והאחזו בה
Gen 34:11 יא ויאמר שכם אל אביה ואל אחיה אמצא חן בעיניכם ואשר תאמרו אלי אתן
Gen 34:12 יב הרבו עלי מאד מהר ומתן ואתנה כאשר תאמרו אלי ותנו לי את הנער לאשה
Gen 34:13 יג ויענו בני יעקב את שכם ואת חמור אביו במרמה--וידברו  אשר טמא את דינה אחתם
Gen 34:14 יד ויאמרו אליהם לא נוכל לעשות הדבר הזה--לתת את אחתנו לאיש אשר לו ערלה  כי חרפה הוא לנו
Gen 34:15 טו אך בזאת נאות לכם  אם תהיו כמנו להמל לכם כל זכר
Gen 34:16 טז ונתנו את בנתינו לכם ואת בנתיכם נקח לנו וישבנו אתכם והיינו לעם אחד
Gen 34:17 יז ואם לא תשמעו אלינו להמול--ולקחנו את בתנו והלכנו
Gen 34:18 יח וייטבו דבריהם בעיני חמור ובעיני שכם בן חמור
Gen 34:19 יט ולא אחר הנער לעשות הדבר כי חפץ בבת יעקב והוא נכבד מכל בית אביו
Gen 34:20 כ ויבא חמור ושכם בנו אל שער עירם וידברו אל אנשי עירם לאמר
Gen 34:21 כא האנשים האלה שלמים הם אתנו וישבו בארץ ויסחרו אתה והארץ הנה רחבת ידים לפניהם את בנתם נקח לנו לנשים ואת בנתינו נתן להם
Gen 34:22 כב אך בזאת יאתו לנו האנשים לשבת אתנו--להיות לעם אחד  בהמול לנו כל זכר כאשר הם נמלים
Gen 34:23 כג מקנהם וקנינם וכל בהמתם הלוא לנו הם אך נאותה להם וישבו אתנו
Gen 34:24 כד וישמעו אל חמור ואל שכם בנו כל יצאי שער עירו וימלו כל זכר--כל יצאי שער עירו
Gen 34:25 כה ויהי ביום השלישי בהיותם כאבים ויקחו שני בני יעקב שמעון ולוי אחי דינה איש חרבו ויבאו על העיר בטח ויהרגו כל זכר
Gen 34:26 כו ואת חמור ואת שכם בנו הרגו לפי חרב ויקחו את דינה מבית שכם ויצאו
Gen 34:27 כז בני יעקב באו על החללים ויבזו העיר--אשר טמאו אחותם
Gen 34:28 כח את צאנם ואת בקרם ואת חמריהם ואת אשר בעיר ואת אשר בשדה לקחו
Gen 34:29 כט ואת כל חילם ואת כל טפם ואת נשיהם שבו ויבזו ואת כל אשר בבית
Gen 34:30 ל ויאמר יעקב אל שמעון ואל לוי עכרתם אתי להבאישני בישב הארץ בכנעני ובפרזי ואני מתי מספר ונאספו עלי והכוני ונשמדתי אני וביתי
Gen 34:31 לא ויאמרו  הכזונה יעשה את אחותנו  {פ}