Gen 30:1 א ותרא רחל כי לא ילדה ליעקב ותקנא רחל באחתה ותאמר אל יעקב הבה לי בנים ואם אין מתה אנכי
Gen 30:2 ב ויחר אף יעקב ברחל ויאמר התחת אלהים אנכי אשר מנע ממך פרי בטן
Gen 30:3 ג ותאמר הנה אמתי בלהה בא אליה ותלד על ברכי ואבנה גם אנכי ממנה
Gen 30:4 ד ותתן לו את בלהה שפחתה לאשה ויבא אליה יעקב
Gen 30:5 ה ותהר בלהה ותלד ליעקב בן
Gen 30:6 ו ותאמר רחל דנני אלהים וגם שמע בקלי ויתן לי בן על כן קראה שמו דן
Gen 30:7 ז ותהר עוד--ותלד בלהה שפחת רחל  בן שני ליעקב
Gen 30:8 ח ותאמר רחל נפתולי אלהים נפתלתי עם אחתי--גם יכלתי ותקרא שמו נפתלי
Gen 30:9 ט ותרא לאה כי עמדה מלדת ותקח את זלפה שפחתה ותתן אתה ליעקב לאשה
Gen 30:10 י ותלד זלפה שפחת לאה--ליעקב בן
Gen 30:11 יא ותאמר לאה בגד (בא גד) ותקרא את שמו גד
Gen 30:12 יב ותלד זלפה שפחת לאה בן שני ליעקב
Gen 30:13 יג ותאמר לאה--באשרי כי אשרוני בנות ותקרא את שמו אשר
Gen 30:14 יד וילך ראובן בימי קציר חטים וימצא דודאים בשדה ויבא אתם אל לאה אמו ותאמר רחל אל לאה תני נא לי מדודאי בנך
Gen 30:15 טו ותאמר לה המעט קחתך את אישי ולקחת גם את דודאי בני ותאמר רחל לכן ישכב עמך הלילה תחת דודאי בנך
Gen 30:16 טז ויבא יעקב מן השדה בערב ותצא לאה לקראתו ותאמר אלי תבוא כי שכר שכרתיך בדודאי בני וישכב עמה בלילה הוא
Gen 30:17 יז וישמע אלהים אל לאה ותהר ותלד ליעקב בן חמישי
Gen 30:18 יח ותאמר לאה נתן אלהים שכרי אשר נתתי שפחתי לאישי ותקרא שמו יששכר
Gen 30:19 יט ותהר עוד לאה ותלד בן ששי ליעקב
Gen 30:20 כ ותאמר לאה זבדני אלהים אתי זבד טוב--הפעם יזבלני אישי כי ילדתי לו ששה בנים ותקרא את שמו זבלון
Gen 30:21 כא ואחר ילדה בת ותקרא את שמה דינה
Gen 30:22 כב ויזכר אלהים את רחל וישמע אליה אלהים ויפתח את רחמה
Gen 30:23 כג ותהר ותלד בן ותאמר אסף אלהים את חרפתי
Gen 30:24 כד ותקרא את שמו יוסף לאמר  יסף יהוה לי בן אחר
Gen 30:25 כה ויהי כאשר ילדה רחל את יוסף ויאמר יעקב אל לבן שלחני ואלכה אל מקומי ולארצי
Gen 30:26 כו תנה את נשי ואת ילדי אשר עבדתי אתך בהן--ואלכה  כי אתה ידעת את עבדתי אשר עבדתיך
Gen 30:27 כז ויאמר אליו לבן אם נא מצאתי חן בעיניך נחשתי ויברכני יהוה בגללך
Gen 30:28 כח ויאמר  נקבה שכרך עלי ואתנה
Gen 30:29 כט ויאמר אליו--אתה ידעת את אשר עבדתיך ואת אשר היה מקנך אתי
Gen 30:30 ל כי מעט אשר היה לך לפני ויפרץ לרב ויברך יהוה אתך לרגלי ועתה מתי אעשה גם אנכי--לביתי
Gen 30:31 לא ויאמר מה אתן לך ויאמר יעקב לא תתן לי מאומה--אם תעשה לי הדבר הזה אשובה ארעה צאנך אשמר
Gen 30:32 לב אעבר בכל צאנך היום הסר משם כל שה נקד וטלוא וכל שה חום בכשבים וטלוא ונקד בעזים והיה שכרי
Gen 30:33 לג וענתה בי צדקתי ביום מחר כי תבוא על שכרי לפניך  כל אשר איננו נקד וטלוא בעזים וחום בכשבים--גנוב הוא אתי
Gen 30:34 לד ויאמר לבן הן  לו יהי כדברך
Gen 30:35 לה ויסר ביום ההוא את התישים העקדים והטלאים ואת כל העזים הנקדות והטלאת כל אשר לבן בו וכל חום בכשבים ויתן ביד בניו
Gen 30:36 לו וישם דרך שלשת ימים בינו ובין יעקב ויעקב רעה את צאן לבן--הנותרת
Gen 30:37 לז ויקח לו יעקב מקל לבנה לח--ולוז וערמון ויפצל בהן פצלות לבנות--מחשף הלבן אשר על המקלות
Gen 30:38 לח ויצג את המקלות אשר פצל ברהטים בשקתות המים--אשר תבאן הצאן לשתות לנכח הצאן ויחמנה בבאן לשתות
Gen 30:39 לט ויחמו הצאן אל המקלות ותלדן הצאן עקדים נקדים וטלאים
Gen 30:40 מ והכשבים הפריד יעקב ויתן פני הצאן אל עקד וכל חום בצאן לבן וישת לו עדרים לבדו ולא שתם על צאן לבן
Gen 30:41 מא והיה בכל יחם הצאן המקשרות ושם יעקב את המקלות לעיני הצאן ברהטים--ליחמנה במקלות
Gen 30:42 מב ובהעטיף הצאן לא ישים והיה העטפים ללבן והקשרים ליעקב
Gen 30:43 מג ויפרץ האיש מאד מאד ויהי לו צאן רבות ושפחות ועבדים וגמלים וחמרים