Gen 10:1 א ואלה תולדת בני נח שם חם ויפת ויולדו להם בנים אחר המבול
Gen 10:2 ב בני יפת--גמר ומגוג ומדי ויון ותבל ומשך ותירס
Gen 10:3 ג ובני גמר--אשכנז וריפת ותגרמה
Gen 10:4 ד ובני יון אלישה ותרשיש כתים ודדנים
Gen 10:5 ה מאלה נפרדו איי הגוים בארצתם איש ללשנו--למשפחתם בגויהם
Gen 10:6 ו ובני חם--כוש ומצרים ופוט וכנען
Gen 10:7 ז ובני כוש--סבא וחוילה וסבתה ורעמה וסבתכא ובני רעמה שבא ודדן
Gen 10:8 ח וכוש ילד את נמרד הוא החל להיות גבר בארץ
Gen 10:9 ט הוא היה גבר ציד לפני יהוה על כן יאמר כנמרד גבור ציד לפני יהוה
Gen 10:10 י ותהי ראשית ממלכתו בבל וארך ואכד וכלנה בארץ שנער
Gen 10:11 יא מן הארץ ההוא יצא אשור ויבן את נינוה ואת רחבת עיר ואת כלח
Gen 10:12 יב ואת רסן בין נינוה ובין כלח--הוא העיר הגדלה
Gen 10:13 יג ומצרים ילד את לודים ואת ענמים ואת להבים--ואת נפתחים
Gen 10:14 יד ואת פתרסים ואת כסלחים אשר יצאו משם פלשתים--ואת כפתרים  {ס}
Gen 10:15 טו וכנען ילד את צידן בכרו--ואת חת
Gen 10:16 טז ואת היבוסי ואת האמרי ואת הגרגשי
Gen 10:17 יז ואת החוי ואת הערקי ואת הסיני
Gen 10:18 יח ואת הארודי ואת הצמרי ואת החמתי ואחר נפצו משפחות הכנעני
Gen 10:19 יט ויהי גבול הכנעני מצידן--באכה גררה עד עזה  באכה סדמה ועמרה ואדמה וצבים--עד לשע
Gen 10:20 כ אלה בני חם למשפחתם ללשנתם בארצתם בגויהם  {ס}
Gen 10:21 כא ולשם ילד גם הוא  אבי כל בני עבר--אחי יפת הגדול
Gen 10:22 כב בני שם עילם ואשור וארפכשד ולוד וארם
Gen 10:23 כג ובני ארם--עוץ וחול וגתר ומש
Gen 10:24 כד וארפכשד ילד את שלח ושלח ילד את עבר
Gen 10:25 כה ולעבר ילד שני בנים  שם האחד פלג כי בימיו נפלגה הארץ ושם אחיו יקטן
Gen 10:26 כו ויקטן ילד את אלמודד ואת שלף ואת חצרמות ואת ירח
Gen 10:27 כז ואת הדורם ואת אוזל ואת דקלה
Gen 10:28 כח ואת עובל ואת אבימאל ואת שבא
Gen 10:29 כט ואת אופר ואת חוילה ואת יובב כל אלה בני יקטן
Gen 10:30 ל ויהי מושבם ממשא באכה ספרה הר הקדם
Gen 10:31 לא אלה בני שם למשפחתם ללשנתם בארצתם לגויהם
Gen 10:32 לב אלה משפחת בני נח לתולדתם בגויהם ומאלה נפרדו הגוים בארץ--אחר המבול  {פ}