Targum, Ezekiel, Chapter 46

Ezek 46:1 כִדנָן אֲמַר יוי אֲלֹהִים תַרעָא דְדָרְתָא גָוָיתָא דִפתִיַח לְמַדנְחָא יְהֵי אֲחִיד שְתָא״שִבעָה#3#״ יוֹמֵי חוּלָא וֻביוֹמָא דְשַבְתָא יְהֵי פְתִיַח וֻביוֹמָא דְיַרחָא יְהֵי פְתִיַח׃
Ezek 46:2 וְיֵיעוֹל רַבָא בְאוֹרַח אוּלַמָא דְתַרעָא מִלְבָרָא״לְמִבַרָא#3#״ וִיקוּם עַל סְקוּפַת תַרעָא וְיַעבְדוּן כְהָנַיָא יָת עֲלָתֵיה וְיָת נִכסַת קוּדשוֹהִי וְיִסגוֹד עַל סְקוּפַת תַרעָא וְיִפוֹק וְתַרעָא לָא יִתאֲחַד עַד רַמשָא׃
Ezek 46:3 וְיִסגְדוּן עַמָא דְאַרעָא בְמַעֲלַנָא דְתַרעָא הַהוּא בְשַבַיָא וֻבַירַחיָא קְֹדָם יוי׃
Ezek 46:4 וַעֲלָתָא דִיקָרֵיב רַבָא קְֹדָם יוי בְיוֹמָא דְשַבְתָא שִתָא אִמְרִין שַלמִין וֻדכַר שְלִים׃
Ezek 46:5 וֻמִנחָתָא מְכִילְתָא לְדִכרָא וֻלאִמְרַיָא מִנחָתָא דְתַדבֵיק יְדֵיה וֻמִשחָא מְלֵי הִינָא לִמכִילְתָא׃
Ezek 46:6 וֻביוֹמָא דְיַרחָא תוֹר בַר תוֹרֵי שְלִים וְשִתָא אִמְרִין וֻדכַר שַלמִין יְהוֹן׃
Ezek 46:7 וֻמכִילְתָא לְתוֹרָא וֻמכִילְתָא לְדִכרָא יַעֲבֵיד מִנחָתָא וֻלאִימְרַיָא כְמָא דְתַדבֵיק יְדֵיה וֻמִשחָא״ומנחתא#3#״ מְלֵי הִינָא לִמכִילְתָא׃
Ezek 46:8 וֻבמֵיעַל רַבָא בְאוֹרַח אוּלַמָא דְתַרעָא יֵיעוֹל וֻבאוֹרחֵיה יִפוֹק׃
Ezek 46:9 וֻבמֵיעַל עַמָא דְאַרעָא לִמִסגַד קְֹדָם יוי בְמוֹעֲדַיָא דְעָלֵיל בְאוֹרַח תְרַע צִיפוּנָא לְמִסגַד יִפוֹק בְאוֹרַח תְרַע דָרוֹמָא וֻדיֵיעוֹל בְאוֹרַח תְרַע דָרוֹמָא יִפוֹק בְאוֹרַח תְרַע צִיפוּנָא לָא יְתוּב בְאוֹרַח תַרעָא דְעַל בֵיה אֲרֵי לְקִבלֵיה יִפוֹק׃
Ezek 46:10 וְרַבָא בֵינֵיהוֹן בְמֵיעַלהוֹן יֵיעוֹל וֻבמִפַקהוֹן יִפְקוּן׃
Ezek 46:11 וֻבחַגַיָא וֻבמוֹעֲדַיָא תְהֵי מִנחָתָא מְכִילְתָא לְתוֹרָא וֻמכִילְתָא לְדִכרָא וֻלאִמְרַיָא דְתַדבֵיק יְדֵיה וֻמִשחָא מְלֵי הִינָא לִמכִילְתָא׃
Ezek 46:12 וַאֲרֵי יַעֲבֵיד רַבָא נְדַבתָא עֲלָתָא אוֹ נִכסַת קוּדשַיָא נְדַבתָא קְֹדָם יוי וְיִפתַח לֵיה יָת תַרעָא דִפתִיַח לְמַדנְחָא וְיַעֲבֵיד יָת עֲלָתֵיה וְיָת נִכסַת קוּדשוֹהִי כְמָא דְיַעֲבֵיד בְיוֹמָא דְשַבְתָא וְיִפוֹק וְיֵיחוֹד יָת תַרעָא בָתַר מִפְקֵיה׃
Ezek 46:13 וְאִימַר בַר שַתֵיה שְלִים תַעֲבֵיד עֲלָתָא לְיוֹמָא קְֹדָם יוי בִצפַר בִצפַר תַעֲבֵיד יָתֵיה׃
Ezek 46:14 וֻמִנחָתָא תַעֲבֵיד עַלוֹהִי בִצפַר בִצפַר חַד מִן שִיתָא בִמכִילְתָא וֻמִשחָא תַלתוּת הִינָא לְעָרָבָא יָת סוּלתָא מִנחָתָא קְֹדָם יוי קְיָם עָלַם תְדִירָא׃
Ezek 46:15 יַעבְדוּן יָת אִימְרָא וְיָת מִנחָתָא וְיָת מִשחָא בִצפַר בִצפַר״בטפר#3#״ עֲלַת תְדִירָא׃
Ezek 46:16 כִדנָן אֲמַר יוי אֲלֹהִים אֲרֵי יִתֵין רַבָא מַתְנָא לְחַד מִבְנוֹהִי אַחסָנְתֵיה הִיא דִבנוֹהִי תְהֵי אֲחוּדַתהוֹן הִיא בְאַחסָנָא׃
Ezek 46:17 וַאֲרֵי יִתֵין מַתְנָא מֵאַחסָנְתֵיה לְחַד מֵעַבדוֹהִי וֻתהֵי לֵיה עַד שַתָא דְיוֹבֵילָא וֻתתוּב לְרַבָא בְרַם״בְיוֹם#3#״ אַחסָנְתֵיה דִבנוֹהִי דִילְהוֹן תְהֵי׃
Ezek 46:18 וְלָא יִסַב רַבָא מֵאַחסָנַת עַמָא לְמֵינַסהוֹן מֵאַחסָנַתהוֹן מֵאַחסָנְתֵיה יַחסֵין לִבנוֹהִי בְדִיל דְלָא יִתבַדְרוּן עַמִי גְבַר מֵאָחסָנְתֵיה׃
Ezek 46:19 וְאַעֲלַנִי בְמַעֲלַנָא דִלעֵיבַר תַרעָא לְלִשכַת״קודשיא#3#״ קוּדשָא דְכָהֲנַיָא דִפתִיחָן לְצִיפוּנָא וְהָא תַמָן אַתרָא בְסוֹפְהוֹן מַערְבָא׃
Ezek 46:20 וַאֲמַר לִי דֵין אֲתַר דִיבַשְלוּן תַמָן כָהֲנַיָא יָת אֲשָמָא וָיָת חַטָתָא דְיֵיפוֹן יָת מִנחָתָא בְדִיל דְלָא לְאַפָקָא לְדָרְתָא בְרָיתָא לְאִתעָרָבָא עִם עַמָא׃
Ezek 46:21 וְאַפְקַנִי לְדָרְתָא בָרָיתָא וְאַעבְרַנִי עַל אַרבַע זָויָת דָרְתָא וְהָא דָרְתָא בְזָוִית דָרְתָא דָרְתָא בְזָוִית דָרְתָא׃
Ezek 46:22 בְאַרבַע זָויָת דָרָתָא דָרְתָא מְקַטְרָן״מְקֻטְרָא#3#״ אַרבְעִין אוּרכָא וֻתלָתִין פֻתיָא מִשחֲתָא חֲדָא לְאַרבַעתֵיהוֹן דְדָרָתָא׃
Ezek 46:23 וְנִדבָכִין עֲבִידִין לְהוֹן סְחוֹר סְחוֹר לְאַרבַעתֵיהוֹן וַאֲתַר לְבַשָלָא עֲבִיד מִלְרַע לְנִדבָכַיָא סְחוֹר סְחוֹר׃
Ezek 46:24 וַאֲמַר לִי דֵין״אלין#3#״ אֲתַר מְתֻקַן לְבַשָלָא דִיבַשְלוּן תַמָן מְשַמְשֵי בֵיתָא יָת נִכסַת קוּדשַיָא דִלעַמָא׃