Ezek 45:1 וֻבפַלָגוּתְכוֹן יָת אַרעָא בְאַחסָנָא תַפְרשוּן אַפרָשוּתָא קְֹדָם יוי קוּדשָא מִן אַרעָא אוּרכָא עַסרִין וְחַמשָה אַלפִין אוּרכָא וֻפֻתיָא עַסרָא אַלפִין קוּדשָא הוּא בְכָל תְחוּמָה סְחוֹר סְחוֹר׃
Ezek 45:2 יְהֵי מִדֵין לְקוּדשָא חֲמֵיש מְאָה בַחֲמֵיש מְאָה מְרֻבַע סְחוֹר סְחוֹר וְחַמשִין אַמִין רַוחָא לֵיה סְחוֹר סְחוֹר׃
Ezek 45:3 וֻמִן מִשחֲתָא הָדָא תִמשַח אוּרכָא עִסרִין וְחַמשָה אַלפִין וֻפוּתיָא עַשׂרָה אַלפִין וֻבֵיה יְהֵי מַקדְשָא קוֹדַש קוּדשִין׃
Ezek 45:4 קוּדשָא מִן אַרעָא הוּא לְכָהֲנַיָא דִמשַמְשִין בְבֵית מַקדְשָא יְהֵי דְקָרִיבִין לְשַמָשָא קְֹדָם יוי וִיהֵי לְהוֹן אֲתַר שְבִיק לְבָתַיָא וְכִבשָא לְמַקדְשָא׃
Ezek 45:5 וְעַשרִין וְחַמשָה אַלפִין אוּרכָא וְעַשׂרָא אַלפִין פוּתיָא וִיהֵי לְלֵיוָאֵי מְשַמְשֵי בֵיתָא״בְבֵית מַקדְשָא#3#״ לְהוֹן לְאַחסָנָא עַסרִין לִשכָן׃
Ezek 45:6 וְאַחסָנַת קַרתָא תִיתְנוּן חַמשָה אַלפִין פוּתיָא וְאוּרכָא עַסרִין וְחַמשָה אַלפִין לִקבֵיל אַפרָשוּת קֻדשָא לְכָל בֵית יִשרָאֵל יְהֵי׃
Ezek 45:7 וֻלרַבָא מִכָא וֻמִכָא לְאַפרָשוּת קוּדשָא וֻלאַחסָנַת קַרתָא לִקבֵיל אַפרָשוּת קוּדשָא וְלִקבֵיל אַחסָנַת קַרתָא מֵרוּחַ מַערְבָא מַערְבָא וֻמֵרוּחַ מַדנְחָא מַדנְחָא וְאוּרכָא לִקבֵיל חַד מִן חְֹלָקַיָא מִתְחוּם מַערְבָא עַל״עד#3#״ תְחוּם מַדנְחָא׃
Ezek 45:8 דָא אַרעָא תְהֵי לְרַבָא לְאַחסָנָא בְיִשרָאֵל וְלָא יֵינְסוּן״יונון#3#״ עוֹד רַברְבַי יָת עַמִי וְאַרעָא יִתְנוּן לְבֵית יִשרָאֵל לְשִבטֵיהוֹן׃
Ezek 45:9 כִדנָן אֲמַר יוי אֲלֹהִים סַגִי לְכוֹן רַברְבֵי יִשרָאֵל חִטפָא וֻבִזָא אַעדוֹ וְדִין דִקשוֹט וְזָכוּ עֲבִידוּ סַלִיקוּ תַקלָתְכוֹן מִגוֹן עַמִי אֲמַר יוי אֲלֹהִים׃
Ezek 45:10 מוֹזְנָוָן דִקשוֹט וֻמכִילָן דִקשוֹט וֻבִתִין דִקשוֹט יְהוֹן לְכוֹן׃
Ezek 45:11 מְכִילְתָא וֻבִיתָא טֵיקַס חַד יְהֵי לְכוֹן סְכוֹם תְלַת סְאִין לְמִסַב מַעסַר כוֹרָא״כוֹלָא#3#״ בִמכִילַת רַטִיבָא בִיתָא וַעֲסַר כוֹרָא יַבִישָא מְכִילְתָא מִן כוֹרָא הָוֵי טִקוּסֵיה׃
Ezek 45:12 וְסִלעָא עִסרִין מָעִין תַלתוּת מַניָא עִסרִין סִלעִין מְנֵי כַספָא עִסרִין וַחֲמֵיש סִלעִין רַבעוּת מַניָא חְמֵיש עַסרֵי סִלעִין כוּלְהוֹן שִתִין מַניָא רַבָא״דבה#3#״ מְנֵי קוּדשָא יְהֵי לְכוֹן׃
Ezek 45:13 דָא אַפרָשוּתָא דְתַפרְשוּן חַד מִן שִיתָא בִמכִילְתָא מִכוֹר חִטִין וְחַד מִן שִתָא בִמכִילְתָא מִכוֹר סְעָרִין׃
Ezek 45:14 וֻדחָזֵי לְמִסַב מִן מִשחָא בִמכִילַת רַטִיבָא מַעסְרָא בִיתָא מִן כוֹרָא חַד מִן עַסרָא הָויָא בִיתָא בְכוֹרָא אֲרֵי עֲסַר בִתִין כוֹרָא׃
Ezek 45:15 וְאִימַר חַד מִן עָנָא מִן מָאתַן דְחָזֵי לְמִסַב מִפִטמָא דְיִשרָאֵל לְמִנחָתָא וֻלעֲלָתָא וֻלנִכסַת קוּדשַיָא לְכַפָרָא עֲלֵיהוֹן אֲמַר יוי אֲלֹהִים׃
Ezek 45:16 כָל עַמָא דְאַרעָא יְהוֹן עָבְדִין יָת אַפרָשוּתָא הָדָא לְרַבָא בְיִשרָאֵל׃
Ezek 45:17 וְעַל רַבָא תְהֵי עֲלָתָא וֻמִנחָתָא וְנִסכַיָא בְחַגַיָא וֻביַרחַיָא וֻבשַבַיָא בְכָל מוֹעֲדֵי בֵית יִשרָאֵל הוּא יַעֲבֵיד יָת חַטָתָא וְיָת מִנחָתָא וְיָת עֲלָתָא וְיָת נִכסַת קוּדשַיָא לְכַפָרָא עַל בֵית יִשרָאֵל׃
Ezek 45:18 כִדנָן אֲמַר יוי אֲלֹהִים בְקַדמָאָה בְחַד לְיַרחָא תִסַב תוֹר בַר תוֹרֵי שְלִים וֻתדַכֵי״ותרבי#3#״ יָת מַקדְשָא׃
Ezek 45:19 וְיִסַב כָהֲנָא מִדְמָא דְחַטָתָא וְיִתֵין עַל סְקוּפַת בֵיתָא וְעַל אַרבַע זָויָת מְסָמְתָא לְמַדבְחָא וְעַל סְקוּפַת תְרַע דָרְתָא גָוָיתָא׃
Ezek 45:20 וְכֵין תַעֲבֵיד בְשִבעָה בְיַרחָא מִגְבַר דְמִשתְלֵי וֻמִטַפַש וֻתכַפְרוּן עַל בֵיתָא׃
Ezek 45:21 בְנִיסָן בְאַרבְעַת עַסרָא יוֹמָא לְיַרחָא יְהֵי לְכוֹן פִסחָא חַגָא שִבעָה יוֹמִין פַטִירָא יִתאֲכִיל׃
Ezek 45:22 וְיַעֲבֵיד רַבָא בְיוֹמָא הַהוּא חֲלִיפוֹהִי וֻחלַף כָל עַמָא דְאַרעָא תוֹרָא לְחַטָתָא׃
Ezek 45:23 וְשִבעָה יוֹמֵי חַגָא יַעֲבֵיד עֲלָתָא קְֹדָם יוי שִבעָה תוֹרִין וְשִבעָה דִכרִין שַלמִין לְיוֹמָא שִבעָה יוֹמַיָא וְחַטָתָא צְפִיר בַר עִזִין לְיוֹמָא׃
Ezek 45:24 וֻמִנחָתָא מְכִילְתָא לְתוֹרָא וֻמכִילְתָא לְדִכרָא יַעֲבֵיד וֻמִשחָא מְלֵי הִינָא לִמכִילְתָא׃
Ezek 45:25 בִשבִיעָאָה בַחֲמֵישְת עַסרָא יוֹמָא לְיַרחָא בְחַגָא יַעֲבֵיד כְאִלֵין שִבעָה יוֹמַיָא כְחַטָתָא כַעֲלָתָא וֻכמִנחָתָא וֻכמִשחָא׃