Targum, Ezekiel, Chapter 29

Ezek 29:1 בְשַתָא עֲסִרֵיתָא בַעֲסִירָאָה בִתרֵי עֲסַר לְיַרחָא הֲוָה פִתגָם נְבוּאָה מִן קְֹדָם יוי עִמִי לְמֵימַר׃
Ezek 29:2 בַר אָדָם קַבֵיל נְבוּאָה עַל פַרעֹה מַלכָא דְמִצרָיִם וְאִתנַבִי עֲלוֹהִי וְעַל מִצרָאֵי כוּלְהוֹן׃
Ezek 29:3 אִתנַבִי וְתֵימַר כִדנָן אֲמַר יוי אֲלֹהִים הָאֲנָא שָלַח רֻגזִי עֲלָך פַרעֹה מַלכָא דְמִצרַיִם דְאַת דָמֵי לְתַנִינָא רַבָא דְשָרֵי בְגוֹ נַהרָוָתָא דַאֲמַר דִילִי מַלכוּתָא וַאֲנָא כַבשֵית׃
Ezek 29:4 וְאַתֵין שֵירִין בְלִסתָך וַאֲקַטֵיל שִלטוֹנֵי תוּקפָך עִם גִיבָרָך וַאֲבָטְלִנָך מִמַלכוּתָך וְיָת כָל שִלטוֹנֵי תוּקפָך עִם גִיבָרָך יִתקַטלוּן׃
Ezek 29:5 וְאַרטְשִינָך לְמַדבְרָא יָתָך וְיָת כָל שִלטוֹנֵי תוּקפָך עַל אַפֵי בָרָא״חקלא#3#״ארעא#3#״ תִתרְמֵי נְבֵילְתָך לָא תִתכְנֵיש וְלָא תִתקְבַר לְחַיַת אַרעָא וֻלעוֹפָא דִשמַיָא מְסַרתָך לְאִשתֵיצָאָה׃
Ezek 29:6 וְיִדְעוּן כָל יָתְבֵי מִצרַיִם אֲרֵי אֲנָא יוי חֲלָף דַהֲווֹ סְמַך קַניָא רְעִיעָא לְבֵית יִשרָאֵל׃
Ezek 29:7 בְאִתכְנָיוּתְהוֹן בָך בְיַד מַלַך תַקִיף תִתמְסַר וְיֵיבַד בֵית רוּחצָנְהוֹן וֻבאִסתְמָכוּתְהוֹן עֲלָך תִיתְבַר וְלָא תְהֵי לְהוֹן לְבֵית סוּמכָן׃
Ezek 29:8 בְכֵין כִדנָן אֲמַר יוי אֲלֹהִים הָאֲנָא מֵיתֵי עֲלַך דְקָטְלִין בְחַרבָא וַאֲשֵיצֵי מִינָך אֲנָשָא וֻבעִירָא׃
Ezek 29:9 וֻתהֵי אַרעָא דְמִצרַיִם לְצָדוּ״לְאִשתְמָמוּ#3#״ וְחָרבָא וְיֵדְעוּן אֲרֵי אֲנָא יוי חֲלָף דַאֲמַר מַלכוּתָא דִילִי וַאֲנָא כַבשֵית׃
Ezek 29:10 בְכֵין הָאֲנָא שָלַח רוּגזִי עֲלָך וְעַל מַלכוּתָך וְאַתֵין יָת אַרעָא דְמִצרַיִם לְחוֹרַב צָדוּ וְאִשתְמָמוּ מִמִגדוֹל סְוֵנֵי וְעַד תְחוּם כוּש׃
Ezek 29:11 לָא תִעבַר בַה רְגַל אֲנָשָא וֻרגַל בְעִירַא לָא תִעבַר בַה וְלָא תִתיַתַב אַרבְעִין שְנִין׃
Ezek 29:12 וְאַתֵין יָת אַרעָא דְמִצרַיִם לְצָדוּ״לחורבא צדו ואישתממו#3#״ בְגוֹ מְדִינָן צָדיָן וְקִרוַהָא בְגוֹ קִרוִין דַהֲוַאָה חָרבָן יִהוְיָן לְצָדוּ אַרבְעִין שְנִין וְאַגלֵי יָת מִצרָאִי לְבֵינֵי עַמְמַיָא וַאֲבַדְרִינוּן בִמדִינָתָא׃
Ezek 29:13 אֲרֵי כִדנָן אֲמַר יוי אֲלֹהִים מִסוֹף אַרבְעִין שְנִין אֲכַנֵיש יָת מִצרָאֵי מִבֵינֵי עַמְמַיָא דְאִתבַדַרוּ לְתַמָן׃
Ezek 29:14 וַאֲתֵיב יָת גַלְוָת מִצרַיִם וַאֲתֵיב יָתְהוֹן לַאֲרַע פַתרוֹס עַל אֲרַע תוֹתָבוּתְהוֹן וִיהוֹן תַמָן מַלכוּ חַלָשָא׃
Ezek 29:15 מִן מַלכְוָתָא תְהֵי חַלָשָא וְלָא תִתרָרַב״תתרברב#3#״ עוֹד עַל עַמְמַיָא וְאַזעֲרִינוּן בְדִיל דְלָא יִפלְחוּן בְעַמְמַיָא׃
Ezek 29:16 וְלָא יְהוֹן עוֹד לְבֵית יִשרָאֵל לְאִתרְחָצָא עֲלֵיהוֹן לְאַדכָרָא חוֹבִין בְאִתפְנָיוּתְהוֹן בָתְרֵיהוֹן וְיִדְעוּן אֲרֵי אֲנָא יוי אֲלֹהִים׃
Ezek 29:17 וַהֲוָה בְעִסרִין וֻשבַע שְנִין בְקַדמָאָה בְחַד לְיַרחָא הֲוָה פִתגָם נְבוּאָה מִן קְֹדָם יוי עִמִי לְמֵימַר׃
Ezek 29:18 בַר אָדָם נְבוּכַדרַצַר מַלכָא דְבָבַל אַפלַח יָת מַשרְיָתֵיה פֻלחַן רַב עַל צֹר כָל סְעַר רֵיש נְתַר וְכָל כְתַף אִתמְרֵיט וַאֲגַר לָא הֲוָה לֵיה וֻלמַשרְיָתֵיה מִצֹר עַל פֻלחָנָא דְאַפלַח עֲלַה׃
Ezek 29:19 בְכֵין כִדנָן אֲמַר יוי אֲלֹהִים הָאֲנָא יָהֵיב לִנבוּכַדנַצַר מַלכָא דְבָבַל יָת אַרעָא דְמִצרַיִם וְיִשבֵי אִתרְגוֹשְתַה וְיִבוֹז בִיזַה וְיִעדֵי עֲדָאַה וֻתהֵי אֲגַר לְמַשרְיָתֵיה׃
Ezek 29:20 אַגרֵיה דְאַפלַח בַה יְהַבִית לֵיה יָת אַרעָא דְמִצרַיִם דְחָבוּ קְֹדָמַי לְאִתפְרָעָא מִנְהוֹן אֲמַר יוי אֲלֹהִים׃
Ezek 29:21 בְעִדָנָא״ביומא#3#״ הַהוּא אֲקִים״אְרֵים#3#״איתי#3#״ פֻרקָן לְבֵית יִשרָאֵל וְלַך אַתֵין מַפתַח פוּמָא בִנבוּאָה בֵינֵיהוֹן וְיִדְעוּן אֲרֵי אֲנָא יוי׃