Isa 49:1 קַבִילוּ נְגָווָן לְמֵימְרִי וְאַצִיתָא מַלכְוָן מֵרַחִיק יוי עַד לָא הְוֵיתִי זָמְנַנִי מִמְעֵי אִמִי אַדכַר שְמִי׃
Isa 49:2 וְשַוִי פִתגָמוֹהִי בְפוּמִי כַחְרַב חָרִיפָא בִטלַל גְבוּרְתֵיה אַגֵין עְלַי וְשַויַנִי״דְשַויַנִי#2#״ כְגִיר בְחִיר דִבבֵית אְזָנִין מְסֻתַר׃
Isa 49:3 וַאְמַר לִי עַבדִי אַת יִשׂרָאֵל דְבָך אַשתַבַח׃
Isa 49:4 וַאְנָא אְמַרִית לְרֵיקָנוּ לְאֵיתִי לְלָמָא וְלָא מִדָעַם חֵילִי שֵיצִיתִי בְרַם דִינִי גְלֵי קְֹדָם יוי וַאְגַר עוּבָדַי קְֹדָם אְלָהִי׃
Isa 49:5 וֻכעַן אְמַר יוי דְאַתקְנַנִי מִמְעַיִן לְמִהוֵי עַבַד פָלַח קְֹדָמוֹהִי לְאָתָבָא דְבֵית יַעְקֹב לְפֻלחָנֵיה וְיִשׂרָאֵל לְדַחלְתֵיה יִתקָרַב וְאַתיַקַר״וְיַקִירנָא#2#״ קְדָם יוי וֻמֵימַר אְלָהִי הְוָה בְסַעְדִי׃
Isa 49:6 וַאְמַר הַזְעֵיר לְכוֹן דְאַתוּן מִתקְרַן עַבדַי לַאְקָמָא יָת שִבטֵי יַעְקֹב וְגָלְוָת יִשׂרָאֵל לְאָתָבָא וְאַתְנִינָך לְנֵיהוֹר עַמְמִין לְמִהוֵי פוּרקָנִי עַד סְיָפֵי אַרעָא׃
Isa 49:7 כִדנָן אְמַר יוי פָרְקֵיה דְיִשׂרָאֵל קַדִישֵיה לְדִבסִירִין בֵינֵי עַמְמַיָא לְדִמטֻלטְלִין בֵינֵי מַלכְוָותָא לְדַהְווֹ עַבדִין לְשִלטוֹנִין לְהוֹן מַלכִין יִחזוֹן וִיקוּמוּן רַברְבִין וְיִסגְדוּן בְדִיל יוי דִמהֵימָן קַדִישָא דְיִשׂרָאֵל וְאִתרְעִי בָך׃
Isa 49:8 כִדנָן אְמַר יוי בְעִדָן דְאַתוּן עָבְדִין רְעוּתִי אְנָא מְקַבֵיל צְלוֹתְכוֹן וֻביוֹם עָקָא אְנָא מְקִים פֻרקָן וֻסעֵיד״וְסָעֵיד#2#״ לְכוֹן וַאְתַקְנִינָך וְאַתְנִינָך לִקיָם עָם לַאֲקָמָא צַדִיקַיָא דְשָכְבִין עַפרָא לְאַחסָנָא יְרוּתָן דְצָדיָן׃
Isa 49:9 לְמֵימַר לְדַאְסִירִין בֵינֵי עַמְמַיָא פוּקוּ לְדַעְגִינִין בֵינֵי מַלכְוָתָא כִד בְקַבלָא אִתגְלוֹ לְנֵיהוֹר עַל אוֹרחָן יִשרוֹן וֻבכָל נִגדִין בֵית מִשרֵיהוֹן׃
Isa 49:10 לָא יִכפְנוּן וְלָא יִצהוֹן לָא יַלקֵינוּן שַרבָא וְשִמשָא אְרֵי דַעְתִיד לְרַחָמָא עְלֵיהוֹן יְדַבְרִינוּן וְעַל מַבוּעֵי מַיָא יַשרֵינוּן׃
Isa 49:11 וַאְשַוֵי טוּרַיָא כְבִישִין קְֹדָמֵיהוֹן כְאוֹרַח וְכִבשַיָא יִראְמוּן׃
Isa 49:12 הָא אִלֵין מֵרַחִיק יֵיתוֹן וְהָא אִלֵין מִצִיפוּנָא וֻמִמַערְבָא וְאִלֵין מֵאְרַע דָרוֹמָא׃
Isa 49:13 שַבַחוּ שְמַיָא וֻבוּעִי אַרעָא וְדוּצוּ טוּרַיָא תֻשבְחָא אְרֵי עְתִיד יוי לְנַחָמָא עַמֵיה וְעַל עִנוְתָנוֹהִי יְרַחֵים׃
Isa 49:14 עַל דַאְמַרַת צִיוֹן סַלֵיק \שְכִינְתֵיה יוי ״יוי שְכִינְתֵיה#2#״ מִנִי וַיוי רַחְקַנִי׃
Isa 49:15 הְאִפשָר דְתִתנְשֵי אִתְתָא בְרַה מִלְרַחָמָא עַל בַר מְעַהָא אַף אִם אִלֵין יִתנַשיָן מֵימְרִי לָא יְרַחְקִנִיך׃
Isa 49:16 הָא כִד עַל יְדִין אַת צָיְרָא קְֹדָמַי שוּרַך לְקִבלִי תְדיִרָא׃
Isa 49:17 יוֹחוֹן יִבנוֹן חָרבָתִיך מְפַגְרַך וֻמַחרְבַך מִנִיך יִגלוֹן׃
Isa 49:18 זְקוּפִי יְרוּשלַם סְחוֹר סְחוֹר עֵינַך וֻחזַא כָל בְנֵי עַם גָלְוָתִיך מִתכַנשִין״דְמִתכַנשִין#2#״ וְאָתַן לְגַוִיך קַייָם אְנָא אְמַר יוי אְרֵי כוּלְהוֹן לִיך כִלבוּש דִיקָר וְעוֹבָדֵיהוֹן בְגַוִיך כְקִשוֹט״כְקִשוּט#3#״ כַלְתָא׃
Isa 49:19 אְרֵי חָרבָתִיך וְצַדיוּתִיך וַאְרַע מְפַגְרוּתִיך אְרֵי כְעַן תִדַחקִין מִיָתִיב וְיִתרַחְקוּן מְסַלעְמַך׃
Isa 49:20 מִכְעַן יֵימְרוּן חַד חַד בְגַוִיך בְנֵי עַם גָלְוָתִיך עָק לִי אַתרָא רְוַח לִי וְאַתֵיב׃
Isa 49:21 וְתֵימְרִין בְלִבִיך מַן רַבִי לִי יָת אִלֵין וַאְנָא תָכְלָא וִיחִידָא גַליָא וֻמטֻלטְלָא וְאִלֵין מַן רַבִי \הא אֲנָא ״הָאְנָא#2#״ אִשתְאַרִית בִלחוֹדַי אִלֵין אֵיכָא הְווֹ׃
Isa 49:22 כִדנָן אְמַר יוי אְלֹהִים הָא אְגַלֵי בְעַמְמַיָא גְבוּרְתִי וְעַל מַלכוּתָא״מַלכְוָותָא#2#״ אְרִים נִסִי וְיַיתוֹן בְנַך בְצַבִין וֻבנָתַך עַל פְרָוָן יִתנַטלוּן׃
Isa 49:23 וִיהוֹן מַלכַיָא תוּרבְיָנַך וֻמַלכָתְהוֹן יְשַמְשוּנִיך עַל אַפֵיהוֹן עַל אַרעָא יִשתַטחוּן לְמִבעֵי מִנִיך וַעְפַר רַגלַך יְלַחְכוּן וְתִדְעִין אְרֵי אְנָא יוי דְלָא יִבַהתוּן צַדִיקַיָא דִמסַבְרִין לְפֻרקָנִי׃
Isa 49:24 הְאִפשָר דְיִתנְסֵיב מִגִיבָרָא עְדַי וְאִם דִשבוֹ זַכָאִין יִשתֵיזַב׃
Isa 49:25 אְרֵי כִדנָן אְמַר יוי אַף דִשבוֹ גִיבָרִין אְתִיב וְדַעְדוֹ תַקִיפִין אְשֵיזֵיב וְיָת פוֹרעָנוּתִיך אְנָא אַתפְרַע וְיָת בְנַך אְנָא אַפרוּק׃
Isa 49:26 וְאַתֵין יָת בְסַר דַהֲווֹ מוֹנַן לִיך מֵיכַל לְכָל עוֹפָא דִשמַיָא וֻכמָא דְמִתרְוַן מֵיחְמַר מְרִית כֵין חַיַת בָרָא מִדַמהוֹן תִתרְוֵי וְיִדְעוּן כָל בְנֵי בִסרָא אְרֵי אְנָא יוי פָרְקִיך וֻמשֵיזְבִיך תַקִיפָא דְיַעְקֹב׃