Isa 43:1 וֻכעַן כִדנָן אְמַר יוי \דִי בְרָך ״דִברָך#2#״ יַעְקֹב וֻדאַתקְנָך יִשׂרָאֵל לָא תִדחַל אְרֵי פְרַקתָך רַבִיתָך בִשמָך דִילִי אַת׃
Isa 43:2 בְקַדמֵיתָא כַד עְבַרתוּן בְיַמָא דְסוּף מֵימְרִי הְוָה בְסַעדְכוֹן פַרעֹה וֻמִצרָאֵי דְסַגִיאִין כְמֵי נַהרָא לָא יִכְלוּן לְכוֹן אַף בְתִניֵיתָא כַד תְהָכוּן לְבֵינֵי עַמְמַיָא דְתַקִיפִין כְאִשָתָא לָא יְכִילוּ״יְכְלוּן#3#״ לְכוֹן וֻמַלכְוָן דְחַסִינָן כְשַלהָבִיתָא לָא יְשֵיצוֹן יָתְכוֹן׃
Isa 43:3 אְרֵי אְנָא יוי אְלָהָך קַדִישָא דְיִשׂרָאֵל פָרְקָך יְהַבִית חְלוֹפָך מִצרַיִם כוּש וֻסבָא תְחוֹתָך׃
Isa 43:4 מִדְאַת חַבִיב קְֹדָמַי אִתיַקַרתָא וַאְנָא רְחֵימתָך וֻמסַרִית עַמְמַיָא תְחוֹתָך וֻמַלכְוָתָא חְלָף נַפשָך׃
Isa 43:5 לָא תִדחַל אְרֵי בְסַעְדָך מֵימְרִי מִמַדנְחָא אַיתִי קְֹדָמָך״#2#״ בְנָך וֻמִמַערְבָא אְקָרֵיב גָלְוָתָך׃
Isa 43:6 אֵימַר לְצִפוּנָא אֵיתַא וֻלדָרוֹמָא לָא תְעַכֵיב אֵיתוֹ״אַיתִי#3#״ בְנַי מֵרַחִיק וְגָלְוָת עַמִי מִסְיָפֵי אַרעָא׃
Isa 43:7 כָל דָא בְדִיל אְבָהָתְכוֹן דְאִתקְרִי שְמִי עְלֵיהוֹן וְלִיקָרִי בְרֵיתִינוּן אַתקֵינִית גָלְוָתְהוֹן אַף עְבַדִית לְהוֹן נִסִין׃
Isa 43:8 דְאַפֵיק עַמָא מִמִצרַיִם דְאִנוּן כִסמַן וְעַינִין לְהוֹן וֻכחַרשִין וְאֻדנִין לְהוֹן׃
Isa 43:9 כָל עַמְמַיָא יִתכַנשוּן כַחדָא וְיִתקָרְבוּן מַלכְוָן מַן בְהוֹן יְחַוֵי דָא וְקַדמַיָיתָא יְבַסְרוּנַנָא יִתְנוּן סָהְדֵיהוֹן וְיִזכוֹן וְיִשמְעוּן וְיֵימְרוּן קְשוֹט׃
Isa 43:10 אַתוּן סָהְדִין קְֹדָמַי אְמַר יוי וְעַבדִי מְשִיחָא דְאִתרְעִיתִי בֵיה בְדִיל דְתִדְעוּן וֻתהֵימְנוּן קְֹדָמַי וְתִסתַכְלוּן אְרֵי אְנָא הוּא אְנָא הוּא דְמִלְקַדמִין אַף עָלְמֵי עָלְמַיָא דִילִי אִנוּן וֻבָר מִנִי לֵית אְלָה׃
Isa 43:11 אְנָא אְנָא יוי וְלֵית בָר מִנִי פָרִיק׃
Isa 43:12 אְנָא חַוֵיתִי לְאַברָהָם אְבוּכוֹן מָא דַעְתִיד לְמֵיתֵי אְנָא פְרַקִית יָתְכוֹן מִמִצרַיִם כְמָא דְקַיֵימִית לֵיה בֵין בִתרַיָא אְנָא אַשמַעִית יָתְכוֹן אוּלפַן אוֹרָיתִי מִסִינַי וְעַד דְאַתוּן קַייָמִין וְלֵית בְכוֹן נוּכרַי וְאַתוּן סָהְדִין קְֹדָמַי אְמַר יוי וַאְנָא אְלָהָא׃
Isa 43:13 אַף מֵעָלמָא״מִן עָלְמָא#2#״ אְנָא הוּא וְלֵית דְמִן יְדִי מְשֵיזֵיב אַעבְדִינַה וְלָא אְתִיבִינַה׃
Isa 43:14 כִדנָן אְמַר יוי פָרִיקְכוֹן קַדִישָא דְיִשׂרָאֵל בְדִיל חוֹבֵיכוֹן אִיתגְלִיתוּן לְבָבַל וַאְחֵיתִית בִמשוֹטִין כֻלְהוֹן וְכַסדָאֵי בִספִינֵי תוּשבְחָתְהוֹן׃
Isa 43:15 אְנָא יוי קַדִישְכוֹן דִברָהִי לְיִשׂרָאֵל מַלכְכוֹן׃
Isa 43:16 כִדנָן אְמַר יוי דְאַתקֵין בְיַמָא אוֹרַח וֻבמַיִין תַקִיפִין שְבִילָא׃
Isa 43:17 דְאַפֵיק רְתִיכִין וְסוּסָוָון מַשרְיָן וְעַם סַגִי כַחדָא אִתבְלַעוּ וְלָא קָמוּ דְעִיכוּ כְבוֹצִין עָמֵי טְפוֹ׃
Isa 43:18 לָא תִדכְרוּן קַדמַייָתָא וֻדמִן אַולָא לָא תִסתַכְלוּן׃
Isa 43:19 \הָא אְנָא ״הָאְנָא#2#״ עָבֵיד חְדַתָא וֻכעַן תִתגְלֵי הְלָא תִידְעוּנַה אַף אְשַוֵי בְמַדבְרָא אוֹרַח בְצַדיוּתָא נַהרָווָן׃
Isa 43:20 יֵיקְרוּן קְֹדָמַי כַד אְיַתֵיב מְדִינָן דְצָדיָן אְתַר דַהְוַאָה שָריָן יָרוּרִין וֻבנָת נַעָמיָן אְרֵי יְהַבִית בְמַדבְרָא מַיָא נַהרִין בְצַדיוּתָא לְאַשקָאָה גָלְוָת עַמִי דְאִתרְעִיתִי בֵיה׃
Isa 43:21 עַמָא דֵין אַתקֵינִית לְפֻלחָנִי בְתוּשבַחתִי יְהוֹן מִשתָעַן׃
Isa 43:22 אְמִיר עַל יְדֵי נְבִיַיָא וְלָא בְפֻלחָנִי עָרַעתוּן דְבֵית יַעְקֹב אְרֵי לְאֵיתוֹן בְאֻלפַן אוֹרָיתִי יִשׂרָאֵל׃
Isa 43:23 לָא אֵיתִיתָא קְֹדָמַי אִימְרִין לַעְלָא וְנִכסַת קֻדשָך לָא יַקַרתָא קְֹדָמַי לָא אַסגִיתִי עְלָך בְקוּרבָנִין וְלָא אַתקֵיפִית עלָך בִלבוֹנְתָא׃
Isa 43:24 לָא זַבֵינתָא קְֹדָמַי בִכסַף קְנֵי בְסַם וֻתרַב נִכסַת קֻדשָך לָא דַהֵינתָא עַל מַדבְחִי בְרַם אַסגִיתָא קְֹדָמַי בְחוֹבָך אַתקֵיפתָא קְֹדָמַי בַעְוָיָתָך׃
Isa 43:25 אְנָא אְנָא הוּא שָבֵיק לְחוֹבָך בְדִיל שְמִי וֻחטָאָך לָא יִדַכרוּן׃
Isa 43:26 אֵימַר כְעַן נְדִין כַחדָא אִשתַעִי אַת אִם תִיכוֹל וְתִזכֵי׃
Isa 43:27 אְבוּך קַדמָאָה חְטָא וֻמַלְפָך מְרַדוּ בְמֵימְרִי׃
Isa 43:28 וְאַפֵיס רַברְבֵי קֻדשָא וְאַמסַר לְקַטלָא יַעְקֹב וְיִשׂרָאֵל לְחִיסוּדִין׃