Isa 33:1 יֵי דְאָתֵי לְמִבַז וְיָתָך לָא יִבְזוּן וֻדאָתֵי לְמֵינַס וְיָתָך לָא יֵינְסוּן כַד תֵיתֵי לְמִיבַז יִבְזוּנָך כַד תִלאֵי לְמֵינַס יֵינְסוּנָך׃
Isa 33:2 יוי רַחֵים עְלַנָא לְמֵימְרָך סַבַרנָא הְוִי תוּקפַנָא בְכָל יוֹם אַף פָרְקַנָא בְעִדָן עָקָא׃
Isa 33:3 מִקָל הָמוֹן אִיתְבַרוּ עַמְמַיָא מִיסְגֵי גְבוּרָן אִתבַדַרוּ״אִתבַדַרָא#2#״ מַלכְווָתָא׃
Isa 33:4 וְיִכנְשוּן בֵית יִשרָאֵל נִכסֵי עַמְמַיָא סָנְאֵיהוֹן כְמָא דְכָנְשִין יָת זַחלָא אָזַן בְמָנֵי זֵינָא כְמָא דְאָזַן בִזרִיקְתָא׃
Isa 33:5 תַקִיף יוי דְאַשרִי שְכִינְתֵיה בִשמֵי מְרוֹמָא דַאְמַר לְמִמלֵי צִיוֹן עָבְדֵי דִין דִקשוֹט וְזָכוּ׃
Isa 33:6 וִיהֵי מָא דַאְמַרתָא לְאֵיטָבָא לְדַחְלָך אֵיתִיתָא וְקַייֵמתָא בְעִדָנֵיה תְקוֹף וֻפוּרקָן חָכמָא וֻמַדַע לְדַחְלַיָא דַיוי אוֹצַר טוּבֵיה עְתִיד׃
Isa 33:7 הָא כַד תִתגְלֵי לְהוֹן יַצוְחוּן בִמרָר אִזגַדֵי עַמְמַיָא דַאְזַלוּ לְבַסָרָא שְלָם תָבוּ לְמִהוֵי בָכַן בִמרָר נְפַש׃
Isa 33:8 צַדִיאוּ כִבשַיָא פְסַקוּ עָדֵי אוֹרחָן עַל דְאַשנִיאוּ קְייָמָא אִתרַחַקוּ מִקִרוֵיהוֹן לָא חַשִיבוּ בְנֵי אְנָשָא דְבִשתָא אַתיָא עְלֵיהוֹן׃
Isa 33:9 אִתאַבַלַת חְרוֹבַת אַרעָא יְבֵיש לִבנָן נְתַר הְוָה שָרוֹנָא כְמֵישְרָא וֻצדִי מַתנַן וְכַרמְלָא׃
Isa 33:10 כְעַן אַתגְלֵי אְמַר יוי כְעַן אַתרָמַם כְעַן אַתנַטַל׃
Isa 33:11 אִתעַשַתתוּן״אִתעַשַתוּן#2#״ לְכוֹן עַמְמַיָא עַשתוֹנִין דִרשַע עְבַדתוּן לְכוֹן עוּבָדִין בִישִין בְדִיל עוּבָדֵיכוֹן בִישַיָא מֵימְרִי כְעַלעוּלָא לְקַשָא יְשֵיצֵי יָתְכוֹן׃
Isa 33:12 וִיהוֹן עַמְמַיָא יְקֵידַת נוּר כוּבִין מְפַסְכִין בְנוּרָא יִתוֹקְדוּן׃
Isa 33:13 שְמַעוּ צַדִיקַיָא דִנטַרוּ אוֹרָיתִי מִלְקַדמִין מָא דַעְבַדִית וְדַעוּ תָבַיָא דְתָבוּ לְאוֹרָיתִי״לְאוֹרָיתָא#2#״ קָרִיב גְבוּרְתִי׃
Isa 33:14 אִתְבַרוּ בְצִיוֹן חַייָבִין דַחלָא אְחַדַתנוּן לְרַשִיעַיָא דַהְווֹ מְגַנְבִין אוֹרחַתְהוֹן אָמְרִין מַן יְדוּר לַנָא בְצִיוֹן דְבַה זֵיהוֹר שְכִינְתָא״שְכִינְתֵיה#3#״ כְאִישָא אָכְלָא מִן״מַן#3#״ יִתוֹתַב לַנָא בִירוּשלַם דְבַה עְתִידִין רַשִיעַיָא לְאִתדָנָא״לְאִידְדָנָא#2#״ לְאִתמְסָרָא לְגֵיהִנָם יְקֵידַת עָלַם׃
Isa 33:15 אְמַר נְבִיָא יִתוֹתְבוּן בַה צַדִיקַיָא כָל דִמהַלֵיך בְזָכוּ וֻממַלֵיל כֵיוָנָן מִתרַחַק מִמָמוֹן דִשקַר מְרַחֵיק נַפשֵיה מִן אָנוֹסִין מְנַע יְדוֹהִי מִלְקַבָלָא שוּחדָא מְטַמטֵים אוּדנוֹהִי מִלְמִשמַע דַם זַכַי וְכַלֵי עֵינוֹהִי מִלְמִחזֵי בְעָבְדֵי בִיש׃
Isa 33:16 הוּא בַאְתַר רָם וֻמנַטַל יְהֵי בֵית מִשרוֹהִי בֵית מַקדְשָא תְסַבַע נַפשֵיה מְזוֹנֵיה מְסַפַק מוֹהִי קַייָמִין כְמַבוּעַ דְמַיִין דְלָא פָסְקִין מוֹהִי׃
Isa 33:17 יָת יְקָר שְכִינַת מַלַך עָלְמַיָא בְתֻשבְחָתֵיה יִחזְיָן עֵינָך תִסתַכַל תִחזֵי בְנָחְתֵי אְרַע גֵיהִנָם׃
Isa 33:18 לִבָך יְחַשֵיב רַברְבָן אֵיכָא סָפְרַיָא אֵיכָא חָשְבַיָא יֵיתוּן אִם יִכְלוּן לְחַשָבָא מִניַן קְטִילֵי רֵישֵי מַשרְיָת גִיבָרַיָא׃
Isa 33:19 יָת מַרוַת עַם תַקִיף לָא תוֹסֵיף לְמִחזֵי עַמָא דַהְוָה עַמִיק מַמלַלהוֹן מִלְמִשמַע מְלַעְגִין בְלִישָנְהוֹן מִדְלֵית בְהוֹן סֻכלְתָנוּ׃
Isa 33:20 תִחזֵי בְמַפַלתְהוֹן צִיוֹן קִריַת זִמנַנָא עֵינָך יִחזְיָן בְנַחָמַת יְרוּשלַם בְאַצלָחוּתַה בִשלֵיוְתַה כְמַשכְנָא דְלָא מִתפָרַק וְלָא מִשתַלפָן״מִשתַלפִין#2#״ סִיכוֹהִי לְעָלַם וְכָל אְטוּנוֹהִי לָא מִתפַסקִין״יִתפַסקוּן#2#״׃
Isa 33:21 אְלָהֵין מִתַמָן תִתגְלֵי גְבוּרְתָא דיוי לְאֵיטָבָא לַנָא מֵאְתַר נָפְקִין נַהרִין שָטְפִין פַתיוּת יְדִין דְלָא תֵיזֵיל בֵיה סְפִינַת צַייָדִין וֻבוּרנֵי רַבְתָא לָא תְגוּזִינֵיה׃
Isa 33:22 אְרֵי יוי דַיָינַנָא דְאַפְקַנָא בִגבוּרְתֵיה מִמִצרַיִם יוי מַלְפַנָא דִיהַב לַנָא אֻלפַן אוֹרָיתֵיה מִסִינַי יוי מַלכַנָא הוּא יִפרְקִנַנָא וְיַעְבֵיד לַנָא פוֹרעָנוּת דִין מִן מַשרְיָת גוֹג׃
Isa 33:23 בְעִדָנָא הַהוּא יִתַברוּן עַמְמַיָא מִתֻקפְהוֹן וִיהוֹן דָמַן לִספִינָא דְאִתפְסִיקוּ חַבלַהָא וְלֵית לַה תְקוֹף עַל תֻרנְהוֹן דְאִתפְסֵיק וְלָא אִפשָר לְמִפרַס עְלוֹהִי קְלַע בְכֵין יְפַלְגוּן בֵית יִשרָאֵל נִכסֵי עַמְמַיָא סַגיוּת עְדַי וֻבַז וְאַפִלוּ אִית בְהוֹן עְוִירִין וַחְגִירִין אַף אִנוּן יְפַלְגוּן סַגיוּת עְדַי וֻבַז׃
Isa 33:24 וְלָא יֵימְרוּן מִכְעַן לְעַמָא דְשָרַן סְחוֹר סְחוֹר לִשכִינְתָא מִלְוָתְכוֹן אְתָת עְלַנָא מַחַת מְרַע עַמָא בֵית יִשרָאֵל יִתכַנְשוּן וִיתוּבוּן לַאְרַעהוֹן״לַאְתַרהוֹן#2#״ שְבִיק לְחוֹבֵיהוֹן׃