Targum, Isaiah, Chapter 14

Isa 14:1 אְרֵי יְרַחֵים יוי עַל בֵית יַעְקֹב וְיִתרְעֵי עוֹד בְיִשׂרָאֵל וְיַשרֵינוּן עַל אְרַעהוֹן וְיִתוֹסְפוּן גִיוֹרִין עְלֵיהוֹן וְיִסתַמכוּן עַל בֵית יַעְקֹב׃
Isa 14:2 וִידַבְרוּנוּנוּן עַמְמִין וְיוֹבְלוּנוּנוּן לַאְתַרהוֹן וְיַחסְנוּנוּנוּן בֵית יִשׂרָאֵל עַל אְרַע שְכִינְתָא דַיוי לְעַבדִין וֻלאַמהָן וִיהוֹן שָבַן לְשָבֵיהוֹן וְיִפלְחוּן בִמשַעבְדֵיהוֹן׃
Isa 14:3 וִיהֵי בְיוֹמָא דִינִיַח יוי לָך מִצַעְרָך וֻמִמַרוְתָך וֻמִן פוּלחָנָא קַשיָא דְאִתפְלַח״דִי אִתפְלַח#2#״ בָך׃
Isa 14:4 וְתִיטוֹל מַתלָא הָדֵין עָל מַלכָא דְבָבַל וְתֵימַר אֵיכְדֵין בְטֵילַת מַרוַת מְשַעבְדַנָא סָף תְקוֹף חַיָיבָא׃
Isa 14:5 תַבַר יוי תְקוֹף רַשִיעִין שֻלטַן חַיָיבִין׃
Isa 14:6 דַהְוָה מָחֵי עַמְמִין בִתקוֹף מַחָן \דִי לַא פָסְקָן מַפלַח בִתקוֹף עַמְמִין מַפלַח וְלָא מָנַע׃
Isa 14:7 נַחַת שְדוֹכַת כָל אַרעָא יַבַעוּ תוּשבְחָא׃
Isa 14:8 אַף שִלטוֹנִין חְדִיאוּ עְלָך עַתִירֵי נִכסַיָא אָמְרִין מֵעִידָן דִשכֵיבתָא״דִי שְכֵיבתָא#2#״ לָא סְלֵיק מְחַבְלָא עְלַנָא׃
Isa 14:9 שְאוֹל מִלְרַע זַעַת לָך לְקַדָמוּת מֵיתָך אַעְרַת לָך גִיבָרִין כֹל עַתִירֵי נִכסַיָא אְקִימוּ מִכֻרסָוָתְהוֹן כָל מַלכֵי עַמְמַיָא׃
Isa 14:10 כוּלְהוֹן יָתִיבוּן״יְתוּבוּן#2#״ וְיֵימְרוּן לָך אַף אַת מְרַעתָא כְוָתַנָא לַנָא דְמֵיתָא׃
Isa 14:11 אִיתַחַת לִשאוֹל יְקָרָך תֻשבְחַת זְמָרָך תְחוֹתָך יְשַווֹן רִימָא וְעֵיל מִינָך רִחשָא׃
Isa 14:12 אֵיכְדֵין אִתרְכֵינתָא מִן רוּמָא דַהְוֵיתָא זֵיוְתָן בְגוֹ בְנֵי אְנָשָא כְכוֹכְבֵי״כְכוֹכָב#2#״ נַגהָא״נֹגהָא#2#״ בֵין כוֹכְבַיָא אִתרְטֵישתָא לְאַרעָא דַהְוֵיתָא קָטֵיל״קְטוֹל#2#״ בְעַמְמַיָא׃
Isa 14:13 וְאַת אְמַרת בְלִיבָך לְרוּמָא אַסַק עֵיל מִן עַמֵיה דַאְלָהָא אְשַוֵי כוּרסֵי מַלכוּתִי וְאַתֵיב בְטוּר זְמַן בִסיָפֵי צִיפוּנָא׃
Isa 14:14 אַסַק עִילָוֵי כָל עַמָא אֵיהֵי עִלַאי מִכוּלְהוֹן׃
Isa 14:15 בְרַם לִשאוֹל תִיתַחַת לִסיָפֵי גוּב בֵית אַבדָנָא׃
Isa 14:16 חָזָך עְלָך יְדִיקוּן בָך יִסתַכְלוּן יֵימְרוּן הְדֵין גוּברָא אְזִיַע אַרעָא אַצדִי מַלכְווָתָא׃
Isa 14:17 שַוִי תֵבֵל כְמַדבְרָא וְקִרווֹהִי פַגַר לַאְסִירוֹהִי לָא פְתַח תַרעָא׃
Isa 14:18 כָל מַלכֵי עַמְמַיָא כוּלְהוֹן שָכְבִין בִיקָר גְבַר בְבֵית עָלְמֵיה׃
Isa 14:19 וְאַת אִתרְכֵינתָא מִקִברָך כְיַחַט טְמִיר חַפִי קְטִילִין מְטָעְנֵי חְרַב נָחְתֵי לְגוּב בֵית אַבדָנָא כְפַגַר מְדַשדַש׃
Isa 14:20 לָא תְהֵי כְחַד מִינְהוֹן בִקבוּרָא אְרֵי אַרעָך חַבֵילתָא עַמָך קַטֵילתָא לָא יִתקַייַם לְעָלַם זַרַע מַבאְשִין׃
Isa 14:21 אַתקִינוּ לִבנֵיהוֹן קְטוֹל בְחוֹבֵי אְבָהָתְהוֹן דִלמָא יְקוּמוּן וְיַחסְנוּן אַרעָא וְיִמלוֹן אַפֵי תֵבֵל בַעְלֵי דְבָב׃
Isa 14:22 וְאַתגְלֵי לְאִתפְרָעָא מִנְהוֹן אְמַר יוי צְבָאוֹת וַאְשֵיצֵי לְבָבַל שוּם״שוֹם#2#״ וֻשאָר וֻבַר וֻבַר בַר אְמַר יוי׃
Isa 14:23 וַאְשַוֵינַה לִירוּתַת קוּפדִין בֵית צָדוּ בִיצִין״בישין#3#״ דְמַיִין וַאְהָמְמִנַה כְמָא דִמהָמְמִין בִמבִינָא וַאְתָבְבִינַה לְשֵיצָאָה אְמַר יוי צְבָאוֹת׃
Isa 14:24 קַיֵים יוי צְבָאוֹת לְמֵימַר אִם לָא כְמָא דְחַשֵיבִית כֵין תְהֵי וֻכמָא דִיעַצִית הִיא תְקוּם׃
Isa 14:25 לְמִתבַר אַתוּרָאָה בְאַרעִי וְעַל טוּרֵי עַמִי אְדוֹשְשִינֵיה וְתִעדֵי מִנְהוֹן מַרוְתֵיה וְנִירֵיה מֵעַל צַורֵיהוֹן יִתפְסֵיק׃
Isa 14:26 דֵין מִלכָא דִמלִיך עַל כָל אַרעָא וְדָא גְבוּרְתָא דִמרָמְמָא״דִי מְרָמְמָא#2#״ דְשַלִיט עַל כָל מַלכְוָתָא׃
Isa 14:27 אַרֵי יוי צְבָאוֹת מְלַך וֻמַן יַעדֵי וֻגבוּרְתֵיה מְרָמְמָא וְלֵית דִיתִיבִינַה׃
Isa 14:28 בְשַתָא דְמִית מַלכָא אָחָז הְוָה מַטַל נְבוּאְתָא הָדָא׃
Isa 14:29 לָא תִחדוֹן פְלִשתָאֵי כוּלְכוֹן אְרֵי אִיתְבַר שִלטוֹן״שולטן#3#״ דַהְוָה מַפלַח בְכוֹן אְרֵי מִבְנֵי בְנוֹהִי דְיִשַי יִפוֹק מְשִיחָא וִיהוֹן עוֹבָדוֹהִי בְכוֹן כְחִיוֵי מַפרִית״מפריח#3#״׃
Isa 14:30 וְיִתפַרנְסוּן חַשִיכֵי עַמָא וְעִנוְתָנַיָא בְיוֹמוֹהִי לְרֻחצָן יִשרוֹן וִימיִת בְכַפנָא בְנַך וֻשאָר עַמִיך יְקַטֵיל׃
Isa 14:31 אֵילִילִי עַל תַרעַך צְוַחִי עַל קִרוַך אִיתְבַרתוּן פְלִשתָאֵי כוּלְכוֹן אְרֵי מִצִיפוּנָא פוֹרעָנָא״פורענותא#3#״ אָתֵי וְלֵית דִמאַחַר בִמזָמְנוֹהִי״בְזִמנוֹהִי#2#״׃
Isa 14:32 וֻמָא יְבַסְרוּן אִזגַדֵי עַמְמַיָא אְרֵי יוי שַכלְלַה״שַכלֵיל#2#״ לְצִיוֹן״צִיוֹן#2#״ וֻבַה יִתרַחְצוּן וְיִחדוֹן חַשִיכֵי עַמָא״עַמֵיה#2#״׃