Isa 11:1 וְיִפוֹק מַלכָא מִבְנוֹהִי דְיִשָי וֻמשִיחָא מִבְנֵי בְנוֹהִי יִתרַבֵי׃
Isa 11:2 וְתִשרֵי עְלוֹהִי רוּחַ״נבואה#3#״ מִן קְֹדָם יוי רוּחַ חָכמָה וְסֻכלְתָנוּ רוּחַ מֵילַך וֻגבוּרָא רוּחַ מַדַע וְדַחלְתָא דַיוי׃
Isa 11:3 וִיקָרְבִיניֵה לְדַחלְתֵיה יוי וְלָא לְחֵיזוּ עֵינוֹהִי יְהֵי דָאֵין״דָאִן#3#״ וְלָא לְמִשמַע אוּדנוֹהִי יְהֵי מוֹכַח׃
Isa 11:4 וִידִין בְקוּשטָא מִסכֵינִין וְיוֹכַח בְהֵימָנוּתָא לְחַשִיכֵי עַמָא וְיִמחֵי חַייָבֵי אַרעָא בְמֵימַר פוּמֵיה וֻבמַמלַל סִפוָתֵיה יְהֵי מָאִית רַשִיעָא׃
Isa 11:5 וִיהוֹן צַדִיקַיָא סְחוֹר סְחוֹר לֵיה וְעָבְדֵי הֵימָנוּתָא מְקָרְבִין לֵיה׃
Isa 11:6 בְיוֹמוֹהִי דִמשִיחָא דְיִשׂרָאֵל יִסגֵי שְלָמָא בְאַרעָא וִידוּר דֵיבָא עִם אִימְרָא וְנִמרָא עִם גַדיָא יִשרֵי וְעֵגַל וְאַריָא וֻפַטִים כַחדָא וְיָניִק זְעיֵר מְדַבַר לְהוֹן׃
Isa 11:7 וְתוֹרְתָא וְדוּבָא יִרעְיָן כַחדָא יִשרוֹן בְנֵיהוֹן וְאַריָא כְתוֹרָא יֵיכוֹל תִבנָא׃
Isa 11:8 וִיחָיֵיך יָנְקָא עַל חוּר חִיוֵי פְתַן וְעַל חֵיזוּ גִלגְלֵי עֵינֵי חִוֵי חֻרמָן חְסִילָא יְדוֹהִי יוֹשִיט׃
Isa 11:9 לָא יַבאְשוּן וְלָא יְחַבְלוּן בְכָל טוּרָא דְקוּדשִי אְרֵי תִתמְלֵי אַרעָא מַדַע יָת דַחלְתָא דַיוי כְמַיָא דִליַמָא חָפַן׃
Isa 11:10 וִיהֵי בְעִידָנָא הַהוּא בַר בְרֵיה דְיִשַי דַעְתִיד דִיקוּם אָת לְעַמְמַיָא לֵיה מַלכְוָן יִשתַמעוּן וִיהֵי אְתַר בֵית מִשרוֹהִי״משריה#3#״ בִיקָר׃
Isa 11:11 וִיהֵי בְעִידָנָא הַהוּא יוֹסֵיף יוי תִניָנוּת גְבוּרְתֵיה לְמִפרַק יָת שְאָרָא דְעַמֵיה דְיִשתְאַר מֵאַתוּר וֻמִמִצרַיִם וֻמִפַתרוֹס וֻמֵהֹדוּ וֻמֵעֵילָם וֻמִבָבַל וֻמֵחְמָת וֻמִנְגָוָת יַמָא׃
Isa 11:12 וְיִזקוֹף אָת לְעַמְמַיָא וִיכַנֵיש מְבֻדְרֵי״מְבַדְרֵי#3#״ יִשׂרָאֵל וְגָלְוָת יְהוּדָה יְקָרֵיב מֵאַרבַע רוּחֵי אַרעָא׃
Isa 11:13 וְתִעדֵי קִנאְתָא מִדְבֵית״דבית#3#״ אַפרַיִם וְדִמעִיקִין לִדבֵית יְהוּדָה יִשתֵיצוֹן דְבֵית אַפרַיִם לָא יְקַנוֹן לִדבֵית״בִדבֵית#2#״ יְהוּדָה וֻדבֵית יְהוּדָה לָא יְעִיקוּן״יָעִיקוּן#3#״ בִדבֵית אַפרָיִם׃
Isa 11:14 וְיִתחַבְרוּן כְתַף חַד לְמִמחֵי יָת״#2#״ פְלִשתָאֵי דִבמַערְבָא כַחדָא יִבְזוּן יָת בְנֵי מַדנְחָא בַאְדוֹם וֻמוֹאָב יוֹשְטוּן״יֵישְטוּן#3#״ יַדהוֹן״ידיהון#3#״ וֻבנֵי עַמוֹן יִשתַמעוּן לְהוֹן׃
Isa 11:15 וִייַבֵיש״וְיַיבֵיש#3#״ יוי יָת לִישָן יַמָא דְמִצרָאֵי״דְמִצרַיִם#2#״ וִירִים מַחַת גְבוּרְתֵיה עַל פְרָת בְמֵימַר נְבִיוֹהִי וְיִמחֵינֵיה לְשִבעָה נַחלִין וִיהָכוּן בֵיה בְסַנדְלִין׃
Isa 11:16 וֻתהֵי אוֹרַח כְבִישָא לִשאָרָא דְעַמֵיה דְיִשתְאַר מֵאַתוּרָאָה כְמָא דַהְוָת לְיִשׂרָאֵל בְיוֹם מִיסַקהוֹן מֵאַרעָא דְמִצרָיִם׃