Targum, Psalms, Chapter 088

Ps 88:1 שירא ותושבחתא על ידיהון דבני קרח על צלותא לשבחא שכלא טבא על ידוי דהימן יציבא׃
Ps 88:2 יהוה אלהא פורקני יימם קבילית בליליא צלותי לקבלך׃
Ps 88:3 תיעול קדמך צלותי אצלי אודנך לבעותי׃ {ת׳׳א} ייתי קדמך צלותי על עמך בית ישראל והט אודנך לתושבחתי דשבחית ליקרך׃
Ps 88:4 ארום שבעת בבישן נפשי וחיי לשייול מטו׃
Ps 88:5 אתחשבית עם נחותי בית אסירי הויתי היך בר נש דלית ליה חילא׃
Ps 88:6 היך רשיעיא דמיתו ולא תבו יתעבדו בני חורין מן מצותא היך קטילין דחרבא שכבי בית קבורתא דלא דכרתנון תוב והינון מאפי שכינתך איתפלגון׃
Ps 88:7 שויתא יתי בגלותא דמתילא לגובא ארעיתא בחשוכיא במצולתא׃
Ps 88:8 עלי סמכת חימתך וכל גזירן בישן תברו יתי ס{י}גפת לעלמין׃
Ps 88:9 ארחיקתא מיודעי מיני שוית יתי ריחוקין״רחיקין#1#״ להון כלוא בבית אסירי ולא אפוק׃
Ps 88:10 עיני זלגת דמעין מן עניותא קריתך יהוה בכל יומא פרסית לותך בצלו ידי׃
Ps 88:11 האפשר די למיתיא תעבד פרישן אין גושמיא דאתמסיאו״דאיתמסרו#1#״ בעפרא יקומון יודון קדמך״קומך#1#״ לעלמין׃
Ps 88:12 האפשר דיתחוי בבית קבורתא טובך קושטך בבית אובדנא׃
Ps 88:13 האפשר דיתוודע״דאיתודע#1#״ בחשך גהינם פרישותך וצדקתך בארע צהותא וצדיא׃
Ps 88:14 ואנא קדמך״קומך#1#״ יהוה צליתי ובצפרא צלותי תקדמינך׃
Ps 88:15 למה יהוה שבקתא״תינשי#1#״ נפשי תעלים״תטמור#1#״ אפך״ספר אפך#1#״ מיני דלא אחמי בנהורך צהורא׃
Ps 88:16 עניא אנא ונגיד מן טליא״טליותא#1#״ סוברית דחילתך טעינא עלי׃
Ps 88:17 עלי עברו רוגזיך בעתייך״בעותיכ#1#״ שיציאו יתי׃
Ps 88:18 אחזרו יתי היך מוי כל יומא אקיפון עלי כחדא׃