Ps 34:1 לדוד כד שני ית מדעיה קדם אבימלך ופטריה ואזל׃
Ps 34:2 אברך ית יהוה בכל עידן תדירא תושבחתיה בפומי׃
Ps 34:3 במימרא דיהוה תושבחת״תשתבח#1#״ נפשי ישמעון עינוותניא ויחדון׃
Ps 34:4 הבו רבותא קדם יהוה עימי ונרומם שמיה כחדא׃
Ps 34:5 תבעית אולפן מן קדם יהוה וענני ומכל דחלתי פצי יתי׃
Ps 34:6 אסתכלו לותיה ואתנהרו ואפיהון לא עצבו׃
Ps 34:7 דין עניא צלי קדם יהוה שמיע ומכל עקתוי פרקיה׃
Ps 34:8 שרי מלאכא דיהוה חזור חזור לדחלין מיניה ושיזיב הינון׃
Ps 34:9 אשתמודעון וחמון ארום טב יהוה טובוי לגבר דאיתרחיץ במימריה׃
Ps 34:10 דחילו מן קדם יהוה קדישוי ארום לית חוסרנא לדחלוי׃
Ps 34:11 בני אריוא אתמסכנו וכפנו ותבעי אולפנא דיהוה לא חסרין כל טובא׃
Ps 34:12 אזילו בניא קבילו מיני דחלתא דיהוה אליף״אאליף#1#״ יתכון׃
Ps 34:13 מן גברא דבעי חיי רחים יומיא למחמי טבא׃
Ps 34:14 טור לישנך מביש וסיפוותך מלמללא ניכלא׃
Ps 34:15 זור מביש ועביד טב בעי שלמא ורדף בתרוהי׃
Ps 34:16 עינוי דיהוה לות צדיקיא ואודנוי לקבלא צלותהון׃
Ps 34:17 פרצופא דיהוה רגיזין בעבדי בישא לשיצאה מן ארעא דכרנהון׃
Ps 34:18 צליין צדיקייא וקדם יהוה שמיע ומכל עקתהון פצינון׃
Ps 34:19 קריב יהוה לתבירי ליבא וית מכיכי רוחא יפרוק׃
Ps 34:20 סגיעין בישן מערען לצדיקא ומן כולהון פצא ליה יהוה׃
Ps 34:21 נטיר לכולהון איברוי חדא מנהון לא מתברא׃
Ps 34:22 מתותא דרשיעא בישא וסנאי צדיקא יתחייבון׃