2Chr 11:1 ואתא רחבעם לירושלם וכנש ית בית יהודה ובנימן מאה ותמנן אלפין גבר גבר אנשי עבדי קרבא למסדרא סדרי קרבא עם בית ישראל לאתבא ית מלכותא לרחבעם׃
2Chr 11:2 והוה פתגם נבואה מן קדם ייי עם שמעיה נביא דייי למימר׃
2Chr 11:3 אמר לרחבעם בר שלמה מליך שבטא דבית יהודה ועם כל בית ישראל דביהודה ובנימן למימר׃
2Chr 11:4 כדנן אמר ייי לא תסקון ולא תגיחון קרבא עם אחיכון בני ישראל תובו גבר לביתיה ארום מן קדם ייי הוה פתגמא הדין וקבילו ית פתגמי דייי ותבו מלמיזל לות ירבעם׃
2Chr 11:5 ויתב רחבעם בירושלם ובנא קרוין כריכן בארע שבטא דבית יהודה׃
2Chr 11:6 ובנא ית בית לחם וית עיטם וית תקוע׃
2Chr 11:7 וית בית צור וית שוכו וית עדלם׃
2Chr 11:8 וית גת וית מרשה וית זיף׃
2Chr 11:9 וית אדורם וית לכיש וית עזקה׃
2Chr 11:10 וית צרעה וית אילון וית חברון די בשיבט יהודה ובשיבט בנימן קרוין כריכן׃
2Chr 11:11 ושפץ ית קרויא כריכתא ומני בהון ארכונין ותסברין מליין מיכלא ומשחא וחמרא׃
2Chr 11:12 ובכל קרי וקרי יהב עגילין ומורנין ותקיפנון לסוגי לחדא והוון ליה שיבט יהודה ושיבט בנימן׃
2Chr 11:13 וכהניא וליואי די בכל ישראל אתעתדו עלוהי מכל תחומיהון׃
2Chr 11:14 ארום שבקו ליואי ית פרויליהון ואחודתהון ואזלו לשיבט יהודה ולירושלם ארום עכיבנון ולא שבקנון ירבעם ובנוי מלשמשא קדם ייי׃
2Chr 11:15 ואקים ליה כומרין לבמסייה ולשידין ולעגלין די עבד׃
2Chr 11:16 ובתריהון מכל שבטא דישראל דיהבין ית לבהון למתבע אולפן מן קדם ייי אלהא דישראל אתו לירושלם לדבחא קדם ייי אלהא דאבהתהון׃
2Chr 11:17 ותקיפו ית מלכותא דבית יהודה ואלימו ית רחבעם בר שלמה לשנין תלת ארום הליכו באורח דוד ושלמה לשנין תלת׃
2Chr 11:18 ונסיב ליה רחבעם אתתא ית מחלת בת ירימות בר דוד וית אביחיל בת אליאב בר ישי׃
2Chr 11:19 וילידת ליה בנין ית יעוש וית שמריה וית זהם׃
2Chr 11:20 ובתרהא נסיב ית מעכה בת אבשלום וילידת ליה ית אביה וית עתאי וית זיזא וית שלמית׃
2Chr 11:21 ורחים רחבעם ית מעכה בת אבשלום מן כל נשוהי ופילקתוהי ארום נשין תמניסרי נסיב ופילקתין שתין ואוליד עשרין ותמניא בנין ושתין בנן׃
2Chr 11:22 ומני לרישא רחבעם ית אביה בר מעכה לארכון על אחוהי ארום אמר למתן ליה מלכותא׃
2Chr 11:23 ובנא ושפיץ קרוין ומני מכל בנוי על כל ארעתא דבית יהודה ובנימן לכלהון קרויא כריכתא ויהב להון מזונא לסוגי ושאיל למסב ריכפת נשיא׃