1Chr 10:1 ופלשתאי אגחו קרבא בישראל ואפכו אנש ישראל מן קדם פלשתאי ונפלו קטילין דחרבא בטורא דגלבוע׃
1Chr 10:2 ואדביקו פלשתאי בתר שאול ובתר בנוהי ומחו פלשתאי ית יהונתן וית אבינדב וית מלכישוע בני שאול׃
1Chr 10:3 ותקיפו עבדי קרבא על שאול ואשכחוהי קשתיא דאומנין מיגד בקשתא ודחיל מן קשתייא׃
1Chr 10:4 ואמר שאול לנטיל זינוי שלוף סייפך וקטולני בה דלמא ייתון ערליא אליין ויתלעבון בי ולא צבה נטיל זיניה ארום הוה דחיל לחדא ונסיב שאול ית סייפא ואתרמא עלה׃
1Chr 10:5 וחזא נטיל זיניה ארום מית שאול ואתרמא אוף הוא על סייפא ומית׃
1Chr 10:6 ומית שאול ותלת בנוי וכל אנש ביתיה דהוו תמן כחדה מיתו׃
1Chr 10:7 וחמון כל אנש ישראל די במישרא ארום אפכו וארום מיתו שאול ובנוי ושבקו קרוהון ואפכו ואתו פלשתאי ויתיבו בהום׃
1Chr 10:8 והוה ביומא אחרן ואתו פלשתאי לערטלא ית קטיליא ואשכחו ית שאול וית תלתא בנוי קטילין רמן על טורא דגלבוע׃
1Chr 10:9 וחלצוהי ואתיזו ית רישיה וית זיינוי ושדרו בארע פלשתא׳ חזור חזור למבשרא ית בית טעוותהון וית עמא׃
1Chr 10:10 ושויאו ית זיינוי בית טעוותהון וית גולגלתי׳ זקפו על זיקפא קביל טעות דגון׃
1Chr 10:11 ושמעו כל אנשי יבש גלעד ית כל מה דעבדו פלשתאי לשאול׃
1Chr 10:12 וקמו כל גבר גבר ונטלו ית גושמא דשאול וית גושמי בנוי ואייתאונון ליבש וקברו ית גרמיהון תחות בוטמא דיבש וצמו שובעא יומין׃
1Chr 10:13 ומית שאול מטול שקריה דשקר במימרא דה׳ מטול פתגמא דה׳ דלא נטר באגחותיה קרבא בדבית עמלק ואוף דשאיל בבידין למתבע מנהון אולפנא׃
1Chr 10:14 ולא תבע אולפנא מן קדם ה׳ באוריא ותומי׳ על דיקטל כהניא די בנוב וקטליה ה׳ וסקף ית מלכותא לדוד בר ישי׃