Josh 3:1 וְאַקדֵים יְהוֹשֻעַ בְצַפרָא וֻנטַלוּ מִשִטִין וַאְתוֹ עַד יַרדְנָא הוּא וְכָל בְנֵי יִשׂרָאֵל וֻבָתוּ תַמָן קְֹדָם דְיִעבְרוּן׃
Josh 3:2 וַהְוָה מִסוֹף תְלָתָה יוֹמִין וַעְבַרוּ סָרְכַיָא בְגוֹ מַשרִיתָא׃
Josh 3:3 וֻפַקִידוּ יָת עַמָא לְמֵימַר כְמִחזֵיכוֹן״בְמִחזֵיכוֹן#3#״ יָת אְרוֹן קְיָמָא דַיְיָ אְלָהְכוֹן וְכָהְנַיָא לֵיוָאֵי נָטְלִין יָתֵיה וְאַתוּן תִיטְלוּן מֵאַתרְכוֹן וֻתהָכוּן בָתְרוֹהִי׃
Josh 3:4 בְרַם רַחִיק יְהֵי בֵינֵיכוֹן וֻבֵינוֹהִי כִתרֵין אַלפִין אַמִין בְמִשחְתָא לָא תִקרְבוּן לְוָתֵיה בְדִיל דְתִדְעוּן יָת אוֹרחָא דִתהָכוּן בַה אְרֵי לָא עְבַרתוּן בְאוֹרחָא מֵאַתמָלִי וֻמִדְקַמוֹהִי״ומדקדמוהי#3#״׃
Josh 3:5 וַאְמַר יְהוֹשֻעַ לְעַמָא אִזדָמַנוּ אְרֵי מְחַר יַעְבֵיד יְיָ בֵינֵיכוֹן פְרִישָן׃
Josh 3:6 וַאְמַר יְהוֹשֻעַ לְכָהְנַיָא לְמֵימַר טוּלוּ יָת אְרוֹן קְיָמָא וַעְבֻרוּ קְֹדָם עַמָא וֻנטַלוּ יָת אְרוֹנָא דִקיָמָא וַאְזַלוּ קְֹדָם עַמָא׃
Josh 3:7 וַאְמַר יְיָ לִיהוֹשֻעַ יוֹמָא דֵין״הָדֵין#2#״ אְשָרֵי לְרַבָיוּתָך בְעֵינֵי כָל יִשׂרָאֵל דְיִדְעוּן אְרֵי כְמָא דַהְוָה מֵימְרִי בְסַעְדֵיה דְמֹשַה כֵין יְהֵי מֵימְרִי בְסַעְדָך׃
Josh 3:8 וְאַת תְפַקֵיד יָת כָהְנַיָא נָטְלֵי אְרוֹנָא דִקיָמָא לְמֵימַר כְמִמטֵיכוֹן״במימטיכון#3#״ עַד קְצָת מֵי יַרדְנָא בְיַרדְנָא תְקוּמוּן׃
Josh 3:9 וַאְמַר יְהוֹשֻעַ לִבנֵי יִשׂרָאֵל אִתקְרַבוּ״קריבו#3#״ הָלְכָא וֻשמַעוּ יָת פִתגָמָא״פִתגָמַיָא#2#״ דַיְיָ אְלָהְכוֹן׃
Josh 3:10 וַאְמַר יְהוֹשֻעַ בְדָא תִדְעוּן אְרֵי אְלָה קַיָים אִתרְעִי״יתרעי#3#״ לְאַשרָאָה שְכִינְתֵיה בֵינֵיכוֹן וְתָרָכָא יְתָרֵיך מִן קְֹדָמֵיכוֹן יָת כְנַעְנָאֵי וְיָת חִתָאֵי וְיָת חִוָאֵי וְיָת פְרִזָאֵי וְיָת גַרגִישָאֵי וַאְמוֹרָאֵי וִיבוּסָאֵי׃
Josh 3:11 הָא אְרוֹן קְיָמָא דְרִיבוֹן כָל אַרעָא״עלמא#3#״ עָבַר קְֹדָמֵיכוֹן בְיַרדְנָא׃
Josh 3:12 וֻכעַן סַבוּ״דְבַרוּ#2#״ לְכוֹן תְרֵי עְסַר גֻברִין מִשִבטֵי יִשׂרָאֵל גֻברָא חַד גֻברָא חַד לְשִבטָא״מִשִבטָא#3#״׃
Josh 3:13 וִיהֵי״וַהְוָה#3#״ כִמנָח פַרסַת רַגלֵי כָהְנַיָא נָטְלֵי אְרוֹנָא דַיְיָ רִבוֹן״דרבון#3#״ כָל אַרעָא בְמֵי יַרדְנָא מֵי יַרדְנָא יִפסְקוּן מַיָא דְנָחְתִין מִלְעֵילָא וִיקוּמוּן״וקמו#3#״ רִכבָא״רֻכבָא#2#״ חַד׃
Josh 3:14 וַהְוָה כַד נְטַלוּ עַמָא מִמַשכנֵיהוֹן״מִקִרוֵיהוֹן#3#״ לְמִעבַר יָת יַרדְנָא וְכָהְנַיָא נָטְלֵי אְרוֹנָא דִקיָמָא קְֹדָם עַמָא׃
Josh 3:15 וֻכמִמטֵי נָטְלֵי אְרוֹנָא עַד יַרדְנָא וְרַגלֵי כָהְנַיָא נָטְלֵי אְרוֹנָא טְבִילָא בִקצָת מַיָא וְיַרדְנָא מְלֵי עַל כָל כֵיפוֹהִי כָל יוֹמֵי חְצָדָא׃
Josh 3:16 וְקָמוּ מַיָא דְנָחְתִין מִלְעֵילָא קָמוּ רִכבָא״רֻכבָא#2#״ חַד״חדא#3#״ רַחִיקִין״דְרַחְקִין#2#״ לַחדָא מֵאָדָם קַרתָא דְבִסטַר צָרְתָן וֻדנָחְתִין לְיַמָא״על ימא#3#״ דְמֵישְרָא לְיַמָא״יַמָא#2#״ דְמִלחָא שְלִימוּ פְסַקוּ וְעַמָא עְבַרוּ לָקְֹבֵיל״קדם#3#״ יְרִיחוֹ׃
Josh 3:17 וְקָמוּ כָהְנַיָא נָטְלֵי אְרוֹן קְיָמָא דַיְיָ בְיַבַשתָא בְגוֹ יַרדְנָא מְתֻקְנַיָא וְכָל יִשׂרָאֵל עָבְרִין בְיַבַשתָא עַד דִשלִימוּ כָל עַמָא לְמִעבַר יָת יַרדְנָא׃